په افغانستان کې د زر او زور خاوندان له قانون تېښته کوي او ازاد ګرځي.
کابل او ولایتونو کې ځينې د زور او زر خاوندان محاکمو په بند محکوم کړي، خو ازاد ګرځي.
زمری پيکان، اصف مومند، داعی الحق عابد، یوسف نورستاني او ضیا یفتلي هغه کسان دي چې د بند په سزا محکوم شوي، خو نیول شوي نه دي.
کورنیو چارو وزارت ته د دې کسانو د نیولو امر ورغلی، خو نه دي توانیدلي چې و یې نیسي.
د اداري فساد پرضد د مبارزې عدلي او قضایي مرکز په اسنادو او شواهدو ځينې چارواکي محاکمه کړي، د بند سزا یې ورته اورولې، خو دا چې قوي ملاتړي لري، پولیس نه دي توانیدلي چې زندان ته یې واچوي.
ضیا یفتلي چې اوس د ولسي جرګې غړی دی، دفاع وزارت کې یې د اوه نورو کسانو سره ۱۷ میلیونه افغانۍ فساد کړی و، په شپږ میاشتي بند محکوم شوی، خو ازاد ګرځي.
زمری پيکان چې د عامه نظم د ساتنې پولیسو مشر و، د فساد په تور په بند محکوم شوی، خو زندان ته نه دی تللی.
یوسف نورستانی چې اوس د مشرانو جرګې غړی دی، هرات کې یې د ولایت پرمهال فساد کړی و، څو ورځې وړاندې به بند محکوم شو، خو نه دی بندي شوی.
اصف مومند چې د بلخ د ولایتي شورا غړی و، د فساد په تور محاکمې ورته د بند سزا اورولې، خو ازاد ګرځي.
د حج او اوقافو وزارت مرستیال داعی الحق عابد چې د فساد په تور په بند محکوم شوی، تراوسه زندان ته نه دی اچول شوی.
د فساد پروړاندې عدلي او قضایي مرکز ته د لوی څارنوالۍ له لوري اته سوه دوسیې ورغلي چې دوه سوه یې څېړل شوي او نورې چې دې مرکز پورې نه اړوند کیدلې، بیرته ستنې شوي دي.
لوی څارنوالۍ دغه راز د ولسي جرګې د فعال غړي میرزا کټوازي دوسیه هم بشپړه کړې او محکمې ته یې لیږلې چې تراوسه پرې پریکړه نه ده شوې.
دا چې پولیس ولې نه دي توانیدلي، د محکمې له لوري پيژندل شوي مجرمین ونیسي، کورنیو چارو وزارت یې د کابل پولیسو کار یادوي او د کابل پولیس حاضر نه دي په دې تړاو مالومات ورکړي.
