د کډوالو په چارو کې د ملګرو ملتونو سترې کمېشنرۍ (یو.اېن.ایچ.سي.آر) له لوري خپره شوې خبرپاڼه کې ویل شوې چې د افغانستان حکومت له لوري د ښځو پر کار د بندیز له امله اړ شوې چې د راستنېدونکو لپاره د مرستو په مرکزونو کې خپلې چارې ودروي.
خبرپاڼه کې وړاندې ویل شوې، په دې مرکزونو کې راستنو شوو ته نغدي مرستې او نور خدمات وړاندې کېدل؛ څو کډوالو ته د ژوند لومړني امکانات برابر او په ټولنه کې د بیا مدغم کېدو چارې ورته اسانه شي.
د خبرپاڼې یوه برخه:« د سپټمبر پر ۹مه د طالبانو له لوري د افغان ښځینه کارکوونکو د کار د بندیز په رڼا کې یو.اېن.ایچ.سي.آر اړ شو چې په ټول افغانستان کې د راستنېدونکو لپاره د مرستو مرکزونو کې خپل فعالیتونه په لنډمهالي ډول ودروي. په دغو مرکزونو کې راستنېدونکو ته نغدي مرسته او نور اړین خدمات وړاندې کېدل، څو له کلونو بې ځایهتوب او جلا وطنۍ وروسته، بېرته له ټولنې سره د هغوی یو ځای کېدل اسانه شي.»
د یو.اېن.ایچ.سي.آر خبرپاڼه کې وړاندې ویل شوې، په افغانستان کې خپل کارکوونکي او په ځانګړي ډول د ښځینه کارکوونکو، خوندیتوب او امنیت ورته لومړیتوب لري.
په خبرپاڼه کې دا هم ويلي، دغه پرېکړه يې د عملیاتي اړتیاوو له مخې کړې چې په خبره یې له ښځینه کارکوونکو بغیر نه شي کولی په راستنېدونکو کې د ۵۲ سلنه مېرمنو په اړه مالومات ترلاسه کړي.
د خبرپاڼې یوه برخه:« دا پرېکړه د عملیاتي اړتیاوو له مخې شوې؛ ځکه پرته له ښځینه کارکوونکو نه شي کېدای د راستنېدونکو ښځو چې ۵۲ سلنه جوړوي، له هغوی سره مرکې وشي یا مالومات تر لاسه شي. موږ له طالبانو سره په دې موضوع مثبتې خبرې پیل کړې او هیلهمن یوو چې داسې حل ته ورسېږو چې ښځینه کارکوونکې بېرته خپلو دندو ته ستنې شي.»
په دې تړاو مو د اسلامي امارت له ویاند او د هغه له مرستیال سره اړیکه وکړه؛ خو د راپور تر خپرېدو یې زموږ اړیکې ځواب نه کړې.
بل لور ته د اقتصادي چارو یو شمېر شنونکي اندېښمن دي چې په هره اندازه چې نړۍوالې مرستې پر افغانستان کمېږي، هومره یې په خبره اقتصادي او پولي نظام هم ضعیفه کېدای شي چې دا کار د افغانانو ستونزې زیاتوي.
دغه راز دوی زیاتوي، هغه څه چې نړۍوالې ادارې غواړي، باید حاکم نظام پرې فکر وکړي.
د اقتصادي چارو شنونکی نور الله عزیز وايي:« د ښځينه کارکوونکو د کار موضوع هغه څه ده چې نړیوالې ټولنې په دغه برخه کې په بار بار دې موضوع ته اشاره کړې او دغه برخه کې یې له حاکم نظام د مرستې او همکارۍ غوښتنه کړې، خو له بده مرغه هغه ژمنې چې حاکم نظام په بېلابېلو بڼو او بېلابېلو بهانو سره کړې، داسې جوته وي چې دوی په دغه برخه کې هیڅ نوع همکارۍ ته لېواله نه دي. »
له دې سربېره یو.اېن.ایچ.سي.آر اعلامیه کې د خپلو چارو په تړاو د هغو ژمنتیاوو پخلی کړی چې د بې ځایه شویو او راستنېدونکو افغانانو لپاره یې بشري اړتیاوې له تېروڅلورو لسیزو راهیسې پوره کولې.
