ولسمشر غني وايي، افغانستان له قفس وتلی او راتلونکې یې روښانه ده.
ولسمشر غني وايي، افغانستان له هیڅ ملت او یا کس سره بنسټیزه شخړه نه لري، بلکې شخړه زموږ په موقعیت ده.
ولسمشر غني د څارنې او انسجام د ګډ بورډ ۲۲ مې ناستې کې افغانستان له قفس وتلی وباله او د افغانانو لپاره یې د ښيې راتلونکی زیری ورکړ او وې ویل چې یو افغان هم نه غواړي بیا بې وطنه شي او د بې وطنه کېدو او سرګردانۍ عصر تللی دی.
غني زیاته کړې چې افغانستان د ترهګرۍ سره د مبارزې په لومړۍ کرښه کې موقعیت لري او افغانان عملاً هره ورځ د نړۍ امنیت لپاره د ترهګرې داعش ډلې سره په جګړه بوخت دي.
ولسمشر ویلي، د سولې برنامه سبب شوه چې افغانان د موجوده نظام او د نظام د پياوړتیا او پایښت لپاره د مبارزې په ارزښتونو او د روانې جګړې په اړخونو پوه شي او دا کار اوس شوی دی.
ولسمشر غني په دغې ناسته کې د خبرو پرمهال د افغانستان جغرافیايي موقعیت د سیمې په کچه ارزښتناک بللی او ډاډ یې ښودلی چې دغه موقعیت، به موږ کرار کرار سیمه کې د عوایدو په څلور لارې بدل کړي.
غني زیاته کړه چې د دښمن هیڅ تبلیغ او دسیسې د امنیتي او دفاعي ځواکونو پر وړاندې د ملت په زړونو کې مینه کمه نه کړه او نه هم هیڅ نفاق اچونکی په دې وتوانید چې موږ د ژبې او قوم په نوم جنګ ته را وکاږي.
ولسمشر د ترهګرۍ ضد مبارزه کې له نړيوالو شریکانو او مرسته کوونکو مننه وکړه او زیاته یې کړه، چې افغانستان هم په دې لاره کې درنه بیه پرې کړې او اوس هم قرباني ورکوي.
ولسمشر غني د څارنې او انسجام د ګډ بورډ ۲۲ مې ناستې کې ویلي، اتلس کاله کېږي چې نړيوال افغانستان سره ولاړ دي او د ترهګرۍ ضد مبارزې سربېره په نورو برخو کې مرستې او همکارۍ کوي خو اوس یې وخت رسېدلی چې د اړیکو او مناسباتو دا کچه او ډول مثبت تغییر وکړي او ډاډ یې ورکړی چې کولی شي دغه تغییر مدیریت کړي.
