د ملګروملتونو د ماشومانو ملاتړ صندوق (یونېسف) له لوري په خپور شوي راپور کې ویل شوي، چې په تېرو شپږو مياشتو کې يې نږدې درې ميليونه ماشومانو سره مرسته کړې.
راپور کې ویل شوي، روان زېږديز کال کې ۲۳.۷ افغانانو، چې ۱۲.۳ میلیونه ماشومان هم په کې شامل دي، د بېړ نیو بشري مرستو غوښتنه کړې.
د یونېسف په راپور کې راغلي، دوی د روان کال په لومړیو شپږو میاشتو کې له ۸.۲ میلیونو تنو ماشومانو او د هغوی له کورنیو سره مرسته کړې او په دې لړ کې د دې سازمان د رواني روغتیا او د ټولنیز رواني ملاتړ له چوپړتیاوو څخه ۲۶ سلنه ښځې هم برخمنې شوې دي.
د راپور یوه برخه:« په ۲۰۲۴ کال د ۱۲.۳ میلیونه ماشومانو په ګډون نږدې ۲۳.۷ میلیونه افغانان بشري مرستو ته اړتیا لري. د کال په لومړیو شپږ میاشتو کې ۸.۲ میلیونه ماشومانو او د هغوی کورنیو ته چې ۲۶ سلنه یې مېرمنې وې، د روانې روغتیا او ټولنیز ملاتړ خدمات وړاندې شوي دي.»
د اقتصاد وزارت مسلکي معین عبداللطیف نظري په اوسنیو شرایطو کې د نړیوالو او مرستندویه سازمانونو مرستې اغېزناکې بولي او ټینګار کوي، چې اسلامي امارت هڅه کوي د ځینو پروژو په پلي کولو سره د بېوزلۍ او بیکارۍ کچه راښکته کړي.
هغه زیاتوي:« د افغانستان خلک هم بشردوستانه او هم پراختیايي مرستو ته اړتیا لري. اسلامي امارت د بېوزلۍ کمولو لپاره د کار موندنې پروژې په لاره اچولي، ترڅو هم د افغانستان زیربناوې ورغول شوي او هم بېوزلي او بېکاري کمه شي.»
د سوداګرۍ او پانګونې خونې مرستیال خیر الدین مایل بیا د بېوزلۍ او بېکارۍ کمولو لپاره د تولیدي کارخونو فعالول مهم ګڼي او له سوداګرو غواړي، چې په هېواد کې لا زیاتې کارخونې فعاله او خلکو ته د کار زمینه برابره کړي.
مایل وايي: « د اوس لپاره تر ټولو نږدې لاره دا ده چې د افغانستان صنعتي سکټور خلکو ته کار ایجاد کړي. په دې سره به هم تولیدي کارخونې بشري ځواک ولري او هم به خلک د کار خاوندان شي.»
د یونېسف د راپور په یوې برخه کې راغلي، د روان کال په مې میاشت کې د بدخشان، تخار او بغلان ولایتونو په ۲۱ ولسوالیو کې د بارانونو او ناڅاپي سېلابونو راوتلو زیاته مرګ ژوبله اړولې او پرمهال یې۱۸۰ تنه مړه او ۲۸۰ نور ټپیان شوي دي.
راپور زیاتوي، د روان زیږدیز کال په لومړۍ نيمايي کې یې نږدې ۴۵۰ زره کسانو ته د څښاک پاکې اوبه، ۲۷۰ زره کسانو ته روغتیا او پاکۍ ساتلو خدمتونه او له نیم میلیون ډېرو کسانو ته د روغتیايي خوندیتوب پیغامونه رسول شوي.
