یونېسف افغانستان کې له زده‌کړو د سلګونه زره نجونو او ماشومانو محروميت په اړه اندیښنه ښودلې

د ملګرو ملتونو د ماشومانو ملاتړ صندوق (یونېسف) ادعا کړې چې د افغانستان سرپرست حکومت ښايي د ۵۰۰ زره نجونو او هلکانو پر مخ د چټکو زده‌کړو هغه سيمه‌ييز ټولګي هم وتړي چې د نړيوالو مرستندويانو له لوري تمويل کېږي.

يونيسف ویلي، که په افغانستان کې د ښوونې او روزنې د برخې فعالو غیر دولتي موسيسو فعالیت بند شي، په پايله کې به يې سلګونه زره نورې نجونې او هلکان هم له زده‌کړو بې برخې شي.

یونېسف زیاته کړې:« په افغانستان کې د ښوونې او روزنې د مخکښې ادارې په توګه، یونېسف د هغو راپورونو په اړه ژوره اندېښنه لري،چې د ۵۰۰ زرو څخه ډېر ماشومان چې ۳۰۰ زره یې نجونې دي، د یوې میاشتې په لړ کې ښايي له زده‌کړو محروم شي.»

د بشري حقونو د څار نړیوال سازمان د ښځو برخې مسوولې هېدر بار هم په دې اړه د اندیښنې په ډول ویلي، چې د سرپرست حکومت له لورې د ښځو د کار په ګډون په ګڼو برخو کې لګول شویو بنديزونو دغلته د ملګرو ملتونو اړوند ادارو فعاليتونه اغېزمن کړي دي.

بار زیاته کړې:« ملګري ملتونه افغانستان کې له سترو ستونزو سره مخ دي. د ملګرو ملتونو د ښځو پر کار د بندیز په ګډون د طالبانو ناسمو غوښتنو ته په غاړې اېښودو سره، خپل پروګرامونه له ډېرو ستونزو سره مخ کړي. د طالبانو د خوشحالولو لپاره د غیر اصولي کړنو په منلو تاسو هېڅ نه شئ ترلاسه کولی.»

د ښځو چارو فعالانې بیا وايي، په یادې پرېکړې سره نه یوازې د ګڼو نجونو او ماشومانو پر وړاندې د زده کړو دروازې تړل کیږي، بلکې ورسره په يوه وار له سلګونه کسانو څخه کاري فرصتونه هم اخېستل کیږي.

د چټکو زده‌کړو پروګرام د یونېسف د پروګرامونو هغه برخه ده، چې د افغانستان په ټولو لرې پرتو سیمو کې هغو نجونو او ماشومانو ته د زده‌کړه زمینه برابروي، چې د ښوونځیو نشتوالي، جګړو او نورو بېلابېلو لاملونو له امله یې زده کړې نیمګړې پاتې دي.