د ماشومانو لپاره د ملګرو ملتونو صندوق یا یونسف په تازه راپور کې ویلي، ۲۰۱۸ م کال کې د افغانستان پر ښوونځیو وسله وال بریدونه درې برابره زیات شوي دي.
یونسف ویلي، ۲۰۱۷ م کال کې ۶۸ بریدونه پر ښوونځیو شوي و چې ۲۰۱۸ م کال کې دغه شمېر بیا ۱۹۲ ته لوړ شوی دی.
یونسف دا هم څرګنده کړې چې دا رقم له ۲۰۱۵ م کال څخه راپدې خوا تر ټولو لوړه ده.
د یونسف اجرایوي مشر هنریتا فور ویلي، افغانستان کې زده کړې تر برید لاندې دي.
فور ویلي، پر ښوونځیو بریدونه، وژنې، ټپیان کېدل او همداراز د استادانو برمته کېدل، هغه ګواښونه دي چې نه یوازې زده کړې زیانمن کوي بلکې د یو نسل ټول خوبونه له منځه وړي.
له زرو څخه زیات ښوونځي افغانستان کې د ناامنیو له امله تړل شوي دي.
یونسف په ډاګه کړې چې کېدای شي د بریدونو د زیاتېدو یو اصلي لامل دا وي چې په ۲۰۱۸ م کال کې ښوونځي د پارلماني ټاکنو د رایو اچولو لپاره کارېدل.
یونسف اندېښنه څرګنده کړې چې کابو ۳.۷ میلیونه ماشومان رسمي ښوونځیو ته لاسرسی نه لري.
