په افغانستان کې د ملګرو ملتونو مرستندویه ماموریت (یوناما) تر ۲۰۲۵ کاله پورې د افغانانو د ملاتړ لپاره خپل ستراتیژیک چوکاټ وړاندې کړ.
د دغه ستراتیژیک چوکاټ موخه په افغانستان کې د زیانمنونکو کسانو لکه ښځې، ماشومان، داخلي بېځایه شوي، کډوال، قومي او مذهبي لږکيو اړتیاوو او حقونو ته لومړیتوب ورکول دي.
د افغانستان لپاره د ملګرو ملتونو د سرمنشي ځانګړې استازې روزا اوتنبایوا د افغانستان خلکو لپاره دغه چوکاټ یو پیاوړی وړاندیز بللی دی.
اوتنبایوا زیاته کړې:« زموږ ستراتېژیک چوکاټ د افغانستان خلکو ته د مرستې رسولو یو پیاوړی وړاندیز دی چې د دوی بشري او اساسي اړتیاوې په ګوته او د ژوند ژغورونکو بشري مرستو روان بهیر بشپړوي.»
دغه ستراتیژیک چوکاټ چې د ملګرو ملتونو د غړو هېوادونو او همکارانو په مشورې ترتیب شوی، د افغانانو د بشري اړتیاوو لپاره یې درې بشپړونکي او دوه اړخیز پیاوړي کوونکي ګډ لومړیتوبونه په ګوته کړي دي.
د ملګرو ملتونو ستراتېژيک چوکاټ یوه برخه:« زموږ د غړو هېوادونو او شریکانو سره په نږدې مشورو کې، د ملګرو ملتونو د هېوادونو ټیم درې بشپړونکي او دوه اړخیزه پیاوړي ګډ لومړیتوبونه، لکه دوامداره اړین خدمتونه، اقتصادي فرصتونه او انعطاف منونکی معیشت او درېيم دا چې ټولنیزه همغږي، پیوستون، جنسیتي برابري، بشري حقونه او د قانون حاکمیت په ګوته کړي؛ ځکه چې دا د افغانانو د اساسي بشري اړتیاوو ملاتړ کوي.»
د افغانستان لپاره د ملګرو ملتونو د بشري مرستو همغږی کوونکی ډینیل انډریس د ملګرو ملتونو مرستې د ډېرېدونکي بشري ناورين د مخنيوي لپاره کافي نه بولي.
هغه زیاته کړه:« ملګري ملتونه او همکاران یې په دې پوهېږي، چې یوازې بشردوستانه مرستې به د منځمهالې او اوږدې مودې لپاره د افغانانو د لویې کچې او ډېریدونکي بشري کړاوونو د حل لپاره بسنه ونه کړي. ایا ملګري ملتونه به وکولی شي دا چوکاټ په بشپړ ډول پلی کړي؟ دا چاره د واکمنو چارواکو پر کړنو او د بسپنه ورکوونکو پر ملاتړ پورې اړه لري.»
حقوقي شنونکي له افغانستانه د ملګرو ملتونو د ملاتړ دوامداره کېدو غوښتنه کوي او ټينګار کوي چې ياد سازمان دې خپلې مرستې په افغانستان کې پر داسې پروژو ولګوي، چې په پایله کې يې خلکو ته کاري فرصتونه برابر شي.
یوناما داسې مهال د افغانانو ملاتړ لپاره سټراټېژيک چوکاټ اعلانوي، چې د دې سازمان د شمېرو له مخې دا مهال په افغانستان کې ۲۸ ميليونه خلک مرستو ته اړتيا لري.
