په افغانستان کې د ملګرو ملتونو سیاسي استازولۍ د دغه هېواد امنیتي،سیاسي،او اقتصادې وضیعت په تړاو درې میاشتني خپور کړې راپور کې د امنيتي پېښو کچه د پام وړ لوړه ښودل شوې.
دا راپور چې شاوخوا ۱۶ مخونو کې نشر شوی، موږ يې یوازې د افغانستان امنیتي وضیعت په تړاو یوه برخه را اخېستې چې په کې لسګونه ملکي وګړو ته د مرګ ژوبلې اوښتولو ادعا شوې.
راپور کې ویل شوې، په تېرو درېیو میاشتو کې د افغانستان په بېلابېلو ولایتونو کې د وسله والو مخالیفینو په بریدونو کې د ښځو او ماشومانو په ګډون شاوخوا ۸۰ تنه ملکي وګړو ژوند له لاسه ورکړی او له ۱۰۰ زیات ټپيان شوې دي.
د راپور یوه برخه:« په دې موده کې ملکي کسانو ته د مرګ ژوبلې اوښتو راپورونه هم ثبت شوې. په تېرو درېیو میاشتو کې په وسله والو بریدونو کې لږ تر لږه ۸۱ کسان چې ۳۷ نارینه، ۸ ښځې، ۱۸ نجونې او ۱۸ تنه هلکان په کې شامل دي وژل شوي او ۱۱۱تنه نور چې ۵۷ نارینه، ۲۴ تنه ښځينه او ۳۰ تنه هلکان په کې شامل دي ټپيان شوې.»
د کورنیو چارو وزارت بیا د یوناما راپور ته په غبرګون کې وايي، اوس مهال په افغانستان کې امنيتې وضعيت د ډاډ وړ دی او هغه وسلوالې ډلې يې ځپلي چې د امنيت ننګولو هڅې يې کړې دي.
بل خوا د سیاسي چارو شنونکي بیا وايي، افغانستان کې امنیتې وضعیت تر ډېره بریده د امنیتې ځواکونو تر کنترول لاندې دی، خو د سیمې استخباراتي کړۍ يې د ناامنه ښودلو هڅې کوي.
د سیاسي چارو شنونکی شهسوار سنګروال وايي:« ولې له بده مرغه د ملګرو ملتونو ادارې داسې تور لګوي چې په افغانستان کې نا امني، دومره لوړه ښيي چې هغه د مبالغې تر کچې پورې رسوي. زه فکر کوم چې دغه ډول څرګندونې بیا بې ځایه دي. په دې کې شک نه شته دی چې په افغانستان کې ستونزې شته، داعش کله ناکله په افغانستان کې بریدونه کوي، د دغو تروریستي ډلو پرته په افغانستان کې دغسې ناامني شتون نه لري چې موږ ووایو، په یوه یا دوې میاشتو کې په لسګونو ملکي وګړو ته مرګ ژوبله اوښتې ده.»
دا په داسې حال کې ده چې له دې وړاندې هم په افغانستان کې د ملګرو ملتونو سياسي استازولۍ د تېر کال په راپور کې د امنيتي پېښو د زياتوالي په تړاو د انديښنې ښودلو ترڅنګ لسګونه کسانو ته د مرګ ژوبلې اوښتلو ادعا کړې وه.
