د افغانستان لپاره د ملګرو ملتونو ادارې یا یوناما په تازه درې میاشتینۍ راپور کې ویلي، چې د ۲۰۱۹ فبروري میاشتې له نهمې نېټې څخه د مې میاشتې نهمې نېټې افغانستان کې تاوتریخوالی کم شوی دی.
په دغه ۱۶ صفحه يي راپور کې د افغان سولې د روانو مذاکراتو د تېرو او راتلونکو ټاکنو په اړه خبرې شوې دي.
د ملګرو ملتونو دغه راپور ویلي چې امنیتي پیښې راکمې شوي او په عمومي توګه د ملکي تلفاتو کچه هم راټيټه شوې ده.
راپور وايي، افغانستان کې بشري ناورین پخپل حال پاتې دی او اوس هم ډیر جدي دی.
ملګرو ملتونو اندیښنه ښودلې چې په ولایتونو کې اوس هم خلک د جګړې او طبیعي پیښو له خپلو سیمو وتلو او بې ځایه کیدو ته اړ کیږي.
راپور هغو بدلونونو ته هم اشاره کړې چې په دې وروستیو کې په ټاکنو کمیسیون کې رامنځ ته شوي دي او دغو پریکړو ته یې د یوه پرمختګ په سترګه کتلي دي.
افغانستان کې هره ورځ کابو پنځوس تنه وژل کېږي
د افغانستان د ملي امنیت سلاکار حمدالله محب وايي، افغانستان کې له ترهګرۍ سره مبارزه کې د ورځې کم تر کمه پنځوس تنه وژل کیږي.
محب دا څرګندونې تیره ورځ د روسیې اوفا ښار کې د روسیې، چین، هند، پاکستان او ایران د ملي امنیت د سلاکارانو په غونډه کې وکړې.
ده وویل چې افغانستان د ترهګرۍ پر ضد د مبارزې لومړۍ کرښه کې دی او له نورو هم غواړي چې له ترهګرۍ سره مبارزې ته لومړیتوب ورکړي.
د افغانستان د ملي امنیت سلاکار وویل«ترهګر او د مخدرو موادو قاچاقبر د یوې سکې دوه مخونه دي، مخدر مواد د تروریزم د تمویل اصلي سرچینه ګڼل کېږي چې له دې درکه هر کال ملیاردونه ډالر ترلاسه کوي.
له دې کرغېړنې پدیدې سره د مقابلې لپاره منظمو او ګډو هلوځلو ته اړتیا ده.»
ده د هیوادونو د امنیت لپاره له مالي جرمونو سره مبارزه هم ضروري وبلله، ویې ویل چې د پیسو د سپینولو، د ناراجستر حوالې له لارې د غیرقانوني پیسو د راکړې ورکړې، او په سیمه کې د بسپنې په نوم د اقداماتو مخنیوی پکار دی.
