د ډیسمبر ۱۰ مه د بشري حقونو له نړیوالې ورځې سره هم مهاله، د ملګرو ملتونو سیاسي استازولۍ (یوناما) په خپره کړې خبرپاڼه کې ټينګار کړی چې سرپرست حکومت دې نجونو ته د زدهکړو او مېرمنو ته د کار اجازې په ورکولو سره د بشري حقونو په برخه کې خپل مکلفيت ادا کړي.
خبرپاڼه کې ویل شوي چې اسلامي امارت دې د یوه باثباته، سولهيیز او هوسا افغانستان لپاره د بشري حقونو د تحقق په برخه کې بنسټیزې ژمنې پوره کړي.
د یوناما مشره روزوا اوتونبایوا وايي:« واکمن چارواکي باید د هغه هېواد ارزښت له پامه ونه غورځوي، چې د بشري حقونو د سازمان غړی او په دې برخه کې اوږده تاریخي مخینه لري او هم د نجونو او مېرمنو حقوقو ته پاملرنه وکړي، څه چې د دې هېواد د ثبات او پرمختګ لپاره مهمه اړتیا ده.»
د یوناما خبرپاڼه کې وړاندې راغلي چې د اسلامي امارت په بیا واکمنېدو سره بشري حقونه په تدریجي او سیستماتیکه بڼه له منځه تللي دي.
اخوا د افغانستان بشري حقونو په برخه کې د ملګرو ملتونو ځانګړی راپور ورکونکی وايي، اسلامي امارت دې د بشري حقونو خبرپاڼه ۷۵ کلیزې سره سم د څلورو ښځينه فعالانو په ګډون د بشري حقونو ټول مدافعان له بند ازاد کړي.
د ملګرو ملتونو ځانګړی راپور ورکونکی رېچارډ بېنېټ وايي:« زه د بشري حقونو ټولو هغو مدافعینو ته درناوي لرم چې د عدالت ، برابرۍ او درناوي لپاره په مبارزه کې یې هڅې کړي اوهر څوک چې په دې برخه کې مبارزه کوي، باید توقیف نه شي.»
خو د اسلامي امارت ویاند ذبیح الله مجاهد بیا ټول بشري حقونه خوندي بولي او ډاډ ورکوي، چې حکومت هغو بشري حقونو تامين ته ژمن دی چې د افغاني ټولنې ارزښتونه يې اېجابوي.
مجاهد زیاتوي:« د بشر حقونو موضوع که له دې تعریف راواخلو چې ژوند د انسان مهم حق دی، په دویمه درجه کې عزت د انسان مهم حق دی، درېیمه درجه کې د انسان مال ساتنه مهم حق ده، په دغو ټولو برخو کې موږ لوی پرمختګ کړی.»
د سیاسي چارو یو شمېر کارپوهان بیا وايي، زده کړې او کار د بشري حقونو بنسټیز حق او د یوه هېواد راتلونکې هوساینه او پرمختګ دی.
د دوی په خبره، سرپرست حکومت دې د نجونو او مېرمنو پر زده کړو او کار وضع شوي بندیزونه پای ته ورسوي.
د سیاسي چارو کارپوه شهسوار سنګروال وايي:« نو ښه به دا وي چې اسلامي امارت د بشر حقونو په تړاو د نجونو زده کړو او کار ته زمینه برابره کړي.»
له دې وړاندې هم څو ځلې ملګرو ملتونو له سرپرست حکومته غوښتي ول چې نړیوالو بشري حقونو ته پاملرنه وکړي او هغه فعالان له زندانه خوشې کړي چې په دې برخه کې یې هڅې کړي دي.
