د افغانستان لپاره د چین ځانګړی استازي یوشیاویونګ په یوه تازه مرکه کې ویلي، د افغانستان د سیاسي مسٸالې حل له ننګونو او فرصتونو سره مخ دی.
نوموړی د افغانستان په اړه نړيوالو او سيمه ييزو غونډو ته په اشارې وايي، د سيمې هېوادونه او ګاونډيان هڅه کوي چې له افغانستان سره د سولې، ثبات او پخلاينې په برخه کې مرستې وکړي.
هغه زياته کړې، د افغانستان سرپرست حکومت د دې هېواد حقیقت دی او په خبره یې لا هم په افغانستان کې ځيني وسله والې ډلې فعالې دي.
له دې سره هم مهاله د اسلامي امارت مرستیال ویاند حمدالله فطرت چین ځانګړي استازي ادعاوې ردوي او وایي، په افغانستان کې هېڅ وسله واله ډله نه شته.
هغه په دې اړه وايي: « افغانستان له چین سره ښې اړیکې لري او ترمنځ یې د اعتماد فضا رامنځته شوې ده. د دواړو هېوادونو اړیکې په بېلابېلو برخو کې د پراخېدو په حال کې دي. دا تشویش چې ګواکي په افغانستان کې خپلسرې ډلې وجود لري، دا په ځای نه بولو. افغانستان اوس امن دی، دلته هېڅ بهرنۍ ډلې ته د فعالیت کولو اجازه نه شته او افغانستان هېچا ته اجازه نه ورکوي چې د افغانستان له داخل نورو ته تهدید رامنځته کړي. په افغانستان کې له نیمې پېړۍ وروسته امن او استقرار راغلی او یو واحد مرکزي حکومت پر ټول افغانستان تسلط لري او باید د دې حمایت وشي. دا چې افغانستان تازه له خونړیو جګړو راوتلی او هم مهاله نړیوالې ټولنې هم پر افغانستان بېلابېل تحریمونه لګوي، د افغانستان د خلکو شتمني یې غصب کړې، دا ټول هغه عوامل دي چې په افغانستان کې یې فقر او بېکاري په یوه جدي ګواښ تبدیل کړي. خو له دې ټولو سره د افغانستان اسلامي امارت د اقتصادي په برخه کې کوټلي ګامونه اخیستي ترڅو افغانستان له اقتصادي پلوه په خپلو پښو ودرېږي. اوس هم هڅې روانې دي چې د کارموندنې په برخه کې پرمختګونه وشي، دغه راز د معلولینو، سوالګرو او بې سرپرسته ماشومانو لپاره هم اسلامي امارت بودیجه ځانګړې کړې ترڅو د هغوی حمایت او ملاتړ وشي. دا طبیعي خبره ده چې جګړه ځپلي هېوادونه له دغسې ننګونو سره مخامخ کېږي، خو موږ مصمم یو چې له دې وضعیته به په یوه ښه لوري راووځو. موږ هم د چین هغه دریځ ستایو چې په افغانستان کې د عدم مداخلې له سیاست حمایت کوي. چین همیشه د افغانستان له خلکو سره د همکاریو شعار ورکړی او د افغانستان له اسلامي امارت سره یې ښې اړیکې دي. چین یوازینی هېواد دی چې تر ټولو زیات په اقتصادي برخه کې په افغانستان کې مصروف دی.»
