پاکستان او ترکمنستان ته له سفرونو وروسته، د افغانستان لپاره د چین ځانګړی استازی یوشیاو یونګ کابل ته راغلی او د سرپرست حکومت له لوړ پوړو چارواکو او په ځانګړې توګه د ریاست الوزرا له سياسي مرستيال او د ملي دفاع وزارت له سرپرست سره یې لیدلي دي.
په دې ليدنو کې د کابل او بېجينګ ترمنځ پر اقتصادي همکاريو، پانګونې او د دوه اړخيزه اړيکو پر پراختيا خبرې شوې.
د چين ځانګړي استازي د ليدنو پرمهال د افغانستان، پاکستان او چين ترمنځ د اړيکو لا غوړېدو او د مسايلو حل لپاره د خپلمنځي تفاهم رامنځته کېدو وړانديز کړی.
د اسلامي امارت مرستیال ویاند حمدالله فطرت وايي: « د چین ځانګړي استازي پاکستان ته د خپل وروستي سفر په اړه مالومات ورکړل او وویل، چین د افغانستان د اقتصادي پياوړتیا او اړیکو پراختیا ته لېواله دی او تل په نړیوالو ناستو کې د افغانستان د دریځ ملاتړ کوي. نوموړي د افغانستان، پاکستان او چین ترمنځ د تفاهم او اړیکو پر پیاوړتیا هم ټینګار وکړ او د افغانستان ځمکنۍ بشپړتیا ته یې د احترام ژمنه وکړه.»
بله خوا، د ریاست الوزرا سياسي مرستيال مولوي عبدالکبیر له چین سره اقتصادي همکاري د پرمختګ په حال کې بللې او يو وار بيا یې د افغانستان له خاورې نورو هېوادونو ته د ګواښ نه پېښېدو ډاډ ورکړی.
حمدالله فطرت په دې اړه وايي: « محترم مولوي صاحب یادونه وکړه چې اسلامي امارت نړیوالو ته ډاډ ورکړی چې له افغانستانه به هېڅ ګواښ نه پېښيږي او په تېرو درېیو کالو کې یې خپلې ژمنې عملي کړې هم دي.»
د افغانستان لپاره د چین ځانګړي استازي د ملي دفاع وزارت له سرپرست سره په کتنه کې د اقتصادي همکاریو، د دوه اړخېزو اړیکو پر پیاوړتیا، سرحدونو او پانګونې خبرې کړې.
د ملي دفاع وزارت سرپرست مولوي محمد یعقوب مجاهد چین د افغانستان د خلکو لپاره یو مهم همکار بللی او ورسره يې د اړیکو پر پیاوړتیا ټینګار کړی.
اوس پوښتنه دا ده چې دا ډول لیدنې د افغانستان پر روان وضعیت څه اغېز لري؟
کارپوهان وايي، چین د افغانستان او سیمې په ثبات کې ستر رول لوبولی شي.
د سیاسي چارو کارپوه محمد سلیم پیګیر وايي: « چین په سیمه او نړۍ کې د یوه اقتدار لرونکي او لوی هېواد په توګه کولی شي د افغانستان په ثبات او تلپاتې سوله کې ستر او بنسټیز رول ولوبوي.»
که څه هم د ملي دفاع وزارت سرپرست او چين د ځانګړي استازي ترمنځ د بحث محور اقتصادي همکاري ياده شوې، خو د ډيپلوماټيکو اصولو په پام کې نيولو سره کارپوهان دې کتنې ته له متفاوتې زاويې ګوري.
دوی وايي، یوشیاویونګ کابل ته له سفر وړاندې اسلام آباد ته تللی او باور دا دی چې ښايي نوموړي له ترهګرۍ سره د مبارزې په برخه کې د اسلام آباد پيغام د ملي دفاع وزارت له سرپرست سره شريک کړی وي.
د نړیوالو اړیکو کارپوه نجیب الرحمن شمال وايي: « دا چې پاکستان په دې وروستیو کې د افغانستان په داخل یا هم د افغانستان پولې ته نږدې د تحریک طالبان پاکستان او نورو وسله والو ډلو د تحرکاتو په اړه یو شمېر اسناد د چین په واک کې ورکړي، شاید په همدې دلیل د چین هېواد استازي د ملي دفاع وزارت د سرپرست ملا یعقوب مجاهد په ګډون د افغانستان د سرپرست حکومت له جګ پوړو چارواکو سره لیدنې کړې، ترڅو وکولی شي ځینې هغه مالومات تر لاسه کړي چې ښايي ضد او نقیض وي او دغه راز د چین حکومت وکولی شي د افغانستان او پاکستان ترمنځ د منازعې د حل لپاره د منځګړي په توګه رول ولوبوي.»
له دې وړاندې د ترکمنستان د بهرنیو چارو وزارت ويلي و چې یوشیاویونګ له ترکمنستاني چارواکو سره په کتنه کې د افغانستان ګاونډیو هېوادونو د نوبتې غونډې جوړېدو په تړاو خبرې کړې.
