په داسې حال کې چې د روسیې حکومت د افغانستان له سرپرست حکومت سره خپلې همکارۍ زیاتې کړې دي، د دې هېواد چارواکو په افغانستان کې د داعش د موجوديت ادعا کړې او دلته یې د دې ډلې پر فعاليت اندېښنه ښودلې.
د ياد هېواد د امنیت شورا د منشي مرستیال یوري کوکوف وايي، داعش ډله هڅه کوي چې له افغانستانه د منځنۍ آسیا هېوادونو ته ځان ورسوي او دا کار د سیمې امنیت ته جدي ګواښ دی.
کوکوف زياته کړې، د داعش د دې هڅو مخنیوي لپاره باید د هېوادونو ترمنځ سیمه ییزې امنیتي همکارۍ لا پیاوړې شي.
کوکوف په دې اړه ویلي: « سره له دې چې په افغانستان کې پراخې جګړې پای ته رسېدلې دي، خو لاهم داسې بې ثباتي پاتې ده چې ګاونډیو هېوادونو ته ګواښ پېښوي. د اسلامي دولت ډلې هغه پلانونه ډېر د اندېښنې وړ دي چې غواړي ترهګري منځنۍ آسیا ته صادره کړي او وروسته یې روسیې ته وغځوي.»
په ورته مهال سرپرست حکومت د مسکو اندېښنو ته په غبرګون کې وايي، دا ډول څرګندونې له واقعيت لرې دي او د داعش خراسان ډلې ځپلو لپاره لازم ګامونه پورته شوي.
د اسلامي امارت مرستیال ویاند حمدالله فطرت وايي: « دا ډول اندېښنې په ځای نه دي چې داعش ډله په افغانستان کې مرکزیت یا د تهدید وړ پراخ نفوذ لري. د اسلامي امارت ځواکونو د داعش ډلې د هر ډول تحرکاتو او مرکز جوړولو مخه نیولې. دا ډول اندېښنې چې وخت نا وخت ښودل کېږي یا تشویشونه خپرېږي، دا دقیق نه دي او موږ یې ردوو.»
له بلې خوا، د سیاسي چارو شنونکي د روسيې دې ادعا ته د شک په نظر ګوري او باور لري چې زبرځواک هېوادونه تل ورته ادعاوې د خپلو اهدافو د تعقيب په موخه کوي.
د سیاسي چارو شنونکی توریالی ځاځی وايي: « سیاست سیاسي ثبات نه لري، دوی د خپلو سیاسي موخو لپاره هره شېبه او دقیقه کولی شي چې خپل سیاست ته بدلون ورکړي. نو د همدې لپاره باید د دوی خبرو ته ارزښت ور نه کړل شي.»
موده وړاندې د افغانستان لپاره د روسیې ځانګړي استازي د اسلامي امارت له چارواکو سره په لیدنه کې ویلي و چې مسکو به د داعش خراسان څانګې پر وړاندې له سرپرست حکومت سره مرسته وکړي.
ضمیر کابلوف د داعش ډله د روسیې او افغانستان ګډ دوښمن یاد کړی و.
