د ملګرو ملتونو سرمنشي انټونیو ګوټرېش د سې شنبې په ماښام په نیویارک کې یوې خبري غونډې ته خبرو پرمهال په افغانستان کې د ملګرو ملتونو په اړوندو دفترونو کې د ښځو پر کار کولو بندیز غیر عادلانه پرېکړه بللې.
انټونیو ګوټرېش په دې خبري غونډه کې ویلي، په افغانستان کې د مرستو رسونې په برخو کې د ملګرو ملتونو په اړوند دفترونو کې د ښځو له کارونو مخنیوی به اړمن افغانان لاپسې وځپي. د نوموړي په وینا، ملګري ملتونه له خپلو شریکانو سره په دې کار کوي چې اسلامي امارت پوه کړي چې په بشرپاله چارو کې د افغان ښځو ګډون د افغانستان لپاره حیاتي دی.
د ملګرو ملتونو سرمنشي انټونیو ګوېرېش زیاته کړې: « اوس مهال په افغانستان کې تر ټولو جدي ستونزه له بشري مرستو د ښځو او نجونو محرومول او دغه راز ښځو او نجونو ته اجازه نه ورکول دي، ترڅو د مرستو په رسولو کې ګډون وکړي. دا کارونه د زغم وړ نه دي.»
په افغانستان کی د ملګرو ملتونو سیاسي استازولي هم ادعا کوي چې اسلامي امارت له څو ورځو راهیسې د ملګرو ملتونو ښځینه کارکوونکي په کابل او ولایتونو کې د ملګرو ملتونو اړونده ادارو او دفترونو ته له ورتګ منع کړې دي. د اسلامي امارت ویاندویان د دې ادعا نه رد اونه هم تایید کړی.
ورته مهال، د چارو شنونکي پر هغو نړیوالو سازمانونو چي ځانونه د بشري حقونو مدافیعن ګڼي، نېوکه کوي چي د دې سازمانونو ادعاوي تر شعارونو پورې محدودې دي. دوی وایي، تشو شعارونو د نړیوالو سازمانونو باور له منځه وړی.
د چارو شنوونکی توریالی ځاځی وايي: « ګوټرېش دې لاړ شي امریکا او اسراییلو ته. هغه نسل وژنه چې اسراییلو په غزه کې پيل کړې، ولې یې ملګري ملتونه مخنیوی نه کوي. له بلې خوا، که دوی غواړي په افغانستان کې د هرڅه په اړه معلومات ترلاسه کړي، نو افغانستان ته دې پلاوی واستوي، ترڅو هرڅه په خپلو سترګو وویني.»
خو یو شمېر نور شنونکي بیا له افغان حکومته غوښتنه کوي چي ښځو او نجونو ته دې د شریعت په رڼا کې د زده کړو او کار کولو زمینه برابره او اجازه دې ورکړي. د دوی په خبره، د نجونو زده کړې نه یوازي د نړیوالو بلکې په کور دننه د ټولو افغانانو غوښتنه او جدي اړتیا ده.
شنونکی محمد اسماعیل ځدراڼ وايي: « اسلامي امارت ته هم په کار ده چې لکه څرنګه چې اسلام ښځو ته د زده کړو او کار اجازه ورکړې، نو دوی هم باید خپل دریځ نرم کړي، ښوونځي او پوهنتونونه بېرته خلاص کړي. که څه هم اسلامي امارت د ښځو ډېر حقونه لکه د میراث حقونه یا هم په بدو کې له ورکولو څخه ژغورل او داسې نور حقونه ورکړي دي.»
په افغانستان کی د ملګرو ملتونو سیاسي استازولۍ داسې مهال نیوکه کړې چې اسلامي امارت یې د ښځينه کارکوونکو پر کار کولو مطلق بندیز لګولی.
