د ملګرو ملتونو سرمنشي انټونیو ګوتېرېش یو ځل بیا په افغانستان کې د ښځو او نجونو پر وضعیت اندېښنه ښودلې.
ګوتېرېش پر خپله اېکس پاڼه په افغانستان کې د ښځو او نجونو پر وړاندې روان وضعیت تبعیضي چلن بللی او د تېرو پېړیو له وضعیت سره یې د پرتلې ترڅنګ د لرې کولو غوښتنه کړې.
ګوتېرېش دغه راز له هغو هېوادونو خپل ملاتړ اعلان او ورسره د یو ځای کېدو خبر ورکړی چې په افغانستان د ښځو د کار او زده کړو غوښتنه کوي او د لګول شویو محدودیتونو د لرې کېدو په ګډون له محرومو افغان ښځو ملاتړ کوي.
هغه په دې اړه وايي:« هغه څه چې دا مهال په افغانستان کې پېښېدونکي دي، ښايي د وروستیو پېړیو د ځپنې له ښکاره سیسټم سره پرتله شي. زه له ټولو هغو هېوادونو او نړیوالو سازمانونو سره یو ځای کېږم او له هغوی ملاتړ کوم چې په افغانستان کې د سرپرست حکومت له خوا د ښځو او نجونو پر وړاندې د تبعیضي محدودیتونو د ژر تر ژره لرې کېدو غوښتنه کوي.»
نوموړي څو ورځې وړاندې هم د افغان ښځو د حقونو په تړاو ځانګړې ناسته کې چې د ملګرو ملتونو د عمومي اسمبلۍ په څنډه کې شوې وه، د افغان ښځو د روان وضعیت په تړاو اندېښنه ښودلې وه.
په یادې ناسته کې له ګوتېرېش سربېره، د نوموړي مرستیالې روزماري ډيکارلو او د ګڼو هېوادونو استازو او دغه راز د افغان ښځو د حقونو مدافع استازو هم ګډون درلود چې په کې له نړۍ وغوښتل شول د افغانستان د ښځو پر وړاندې روان وضعیت جدي ونیسي او په خپلو کاري لومړیتوبونو کې ځای ورکړي.
د سیاسي چارو شنوونکی زلمی افغانیار وايي: « ټولو سیاسي ستونزو ته د خبرو له لارې حل پیدا کېدای شي. پر افغانستان راوړل کېدونکي فشارونه د ستونزو د هوارولو او حقونو د خوندیتوب لپاره نه دي، بلکې دوی د خپلو راتلونکو پروګرامونو لپاره تبلیغات کوي.»
دغه راز ځېنې نور بیا د سرپرست حکومت او نړيوالې ټولنې ترمنځ د شته واټن یو اصلي لامل د ښځو د حقونو په تړاو شته ستونزې بولي.
دوی د همدې واټن له منځه وړلو لپاره له اسلامي امارت د انعطاف او خنډونو له منځه وړلو غوښتنه کوي.
د سیاسي چارو کارپوه شهسوار سنګروال په دې اړه وايي: « دا چې اسلامي امارت تر اوسه په نړیواله توګه پر رسمیت نه دی پېژندل شوی، یو لامل یې هم د ښځو حقونه او د نجونو زده کړې دي. د دې لپاره چې دغه ستونزه حل شي، ښه به وي چې طالبان جدي پاملرنه وکړي، ترڅو هم ولس راضي شي او هم نړۍ.»
ومو غوښتل د ښځو وضعیت په تړاو د ملګرو ملتونو د سرمنشي انټویو ګوتېرېش د څرګندونو په اړه د سرپرست حکومت غبرګون هم له ځان سره ولرو؛ خو بریالي نه شو.
دا په داسې حل کې ده چې له دې وړاندې سرپرست حکومت په کراتو د ښځو حقونو خوندي بللي او له نړۍ یې په دې برخه کې د لاسوهنې نه کولو غوښتنه کړې.
