د ملګرو ملتونو سرمنشي انتونیو ګوترېش په برازیل کې یوې غونډې ته د وينا پرمهال له بډايه هېوادونو غوښتي چې د اقلیمي بدلون د ناوړه اغېزو مخنیوي لپاره د له بېوزله هېوادونو سره مالي مرسته وکړي.
نوموړي زیاته کړې، د اقليمي بدلون له امله اغېزمن شوي هېوادونه له ياد کړکېچ سره د مقابلې لپاره مرستې ته اړتيا لري.
افغانستان هم د مخ پر ودې هېوادونو په هغه ډله کې شمېرل کېږي چې د اقليمي بدلون له امله اغېزمن شوی او د حکومت په شمول يې خلکو په آذربايجان کې د اقليمي بدلون په اړه د روانې سترې غونډې له ګډونوالو غوښتي چې د اقليمي بدلون اغېزمنتيا پر وړاندې ورسره مرسته وکړي.
اوس د دې غونډې ځينې ګډونوال وايي، ټاکل شوې د کاپ -۲۹ غونډې ځينې ګډونوالو هېوادونو استازي د يادې غونډې په څنډه کې له اقليمي پلوه د افغانستان پر اغېزمنتيا خبرې وکړي.
د کاپ غونډې ګډونوال عبدالهادي اڅکزی وايي: « د دې کنفرانس هدف دا دی چې موږ وکولی شو په افغانستان کې د اقلیم د بدلون ناخوالې چې موږ یې اوس تجربه کوو او هغه مالي او تخنیکي موضوعات چې موږ یې په افغانستان کې لرو خو افغانستان ترې ګټه نه شي اخیستلی، په دې اړه به هم په دې کنفرانس کې بحث وشي. دا کنفرانس به د یوه ساعت لپاره دوام وکړي او په رسمي بڼه به یې ریکارډ هم د اقلیم بدلون نړیوال کنفرانس له مشرتابه سره شریک شي. موږ هڅه کوو چې د افغانستان غږ یو تر بله ورسوو او وکولی شو افغانستان ته یوه اندازه بودیجه او څه تخنیکي امکانات په نظر کې ونیول شي.»
د چاپېريال ساتنې ملي اداره کاپ غونډې ته د خپل ورغلي پلاوي د ليدنو په اړه معلومات نه ورکوي، خو له دې وړاندې يې ویلي وو چې افغانستان د اقلیمي بدلون له امله د زيانمنو هېوادونو په ډله کې شپږم ځای لري.
کارپوهان وایي، افغانستان د اقلیمي بدلون له امله له بېلابېلو ستونزو سره مخ دی او د دغو ننګونو پر وړاندې د مبارزې لپاره د نړیوالې ټولنې مرستو ته اړتیا لري.
د اقلیمي بدلون کارپوه مصطفی وايي: « د دې لپاره چې د اقلیم بدلون اغېزې په افغانستان او نورو هېوادونو کې کمې شي او وکولی شي په دې برخه کې شته لارو چارو او پروژو کار واخلي، ترڅو د اقلیم منفي تاثیرات یو څه راکم شي.»
ځينې نور بیا د اقلیمي بدلون له پايلو سره د مبارزې لپاره له افغانستان سره د نړيوالو مرستې اړينې بولي او ټينګار کوي چې دا مرستې بايد سياسي نه شي.
د نړیوالو اړیکو کارپوه نجیب الرحمن شمال وايي: « نړیوال سازمانونه او د نړۍ هېوادونه باید په دې موضوع کې د خپل مسوولیت په درک کولو سره، له چټل او ناپاک محیط د افغانستان د ژغورلو لپاره همکاري وکړي، ترڅو د افغانستان خلک له دې وژونکې پدیدې وژغورل شي. »
د اقلیمي بدلون په ۲۹مه غونډه کې د نړۍ ۱۹۸ هېوادونو د استازو په ګډون د اسلامي امارت پلاوی هم حضور لري ترڅو د اقلیمي بدلونونو د ناوړه اغېزو او د دغې ښکارندې د مخنیوي پر لارو چارو خبرې اترې وکړي.
