ګوترس: اسلامي امارت له ۱۰۰  زیات پخواني نظامیان وژلي 

د ملګرو ملتونو  په تازه راپور کې د یاد سازمان عمومي منشي انټونیوګوترس ویلي،اسلامي امارت عمومي عفوه بشپړه نه ده عملي کړې او د بښنې اصولو یې ترپښو لاندې کړي دي.

 راپور کې اسلامي امارت پر صحرايي محاکمو تورن شوی او ویل شوي، چې د تېرې اګسټ میاشتې له ۱۵مې نیټې راپدیخوا اسلامي امارت د تیر حکومت له ۱۰۰  زیات نظامیان وژلي دي.

د ملګرو ملتونو د  راپور  یوه برخه:«ملګرو ملتونو داسې باوري ادعاوې تر لاسه کړي دي،چې ګواکې طالبانو له ۱۰۰ زیات هغه کسان وژلي،چې د تیر حکومت ځواکونه وو او یا یې له بهرنیو ځواکونو سره کار کړی وو. دغه وژنې د تیر اګسټ میاشتې له ۱۵مې نیټې را پدیخوا شوې دي.» 

د راپور په حواله په دغو کسانو تر نیمايي زیات کسان په صحرايي محاکمه کې له داعش او نورو وسله والو ډلو سره د اړیکو په تور له منځه وړل شوي دي.

د ملګرو ملتونو د راپور یوه برخه:« د وژل شویو کسانو دوه پر درېیمه برخه هغوی دي،چې پرته د محاکمې له پرېکړې وژل شوي دي. دغه کسان له بېلابېلو وسله والو ډلو سره د اړیکو درلودلو په تور له منځه وړل شوي دي.» 

اسلامي امارت بیا د ملګرو ملتونو دغه ادعاوې بې بنسټه بللي او رد کړې یې دي.

کورنیو چارو وزارت د یوې خبرپاڼې په خپرولو سره ویلي، له عمومي بښنې وروسته د دوی له خوا څوک نه دي وژل شوي.

د یاد وزارت د خبرپاڼې یوه برخه:« کورنیو چارو وزارت دا ډول  راپورونه ردوي.اسلامي امارت له عمومي عفوې وروسته هيڅوک نه دی وژلی،ځينې پيښې چې موږ یې لرو، د تیرې ادارې نظامیان د شخصي دښمنيو پر اساس هدف ګرځول شوي،چې هغه پيښې هم ترجدي تحقیق او پلټنې او لاندې دي.» 

د ملګرو ملتونو په دغه تازه راپور کې ګوترس د افغانستان د روان وضعیت په تړاو هم اندیښنه څرګنده کړې او له افغانانو سره یې د بېړنیو بشري مرستو غوښتنه یې کړې ده.  

انتونیو ګوترس همدا راز ویلي، داسې ښکاري،چې په افغانستان کې ښځې او نجونې د کار او زده کړو له اساسي حقونو محرومېږي