د پاکستان تر کنټرول لاندې خيبرپښتونخوا او قبايلي سيمو کې روانو ناامنيو هلته جدي اندېښنې پارولې دي او له همدې امله د خيبرپښتونخوا اعلی وزير ويلي، مرکزي حکومت يې د افغانستان له اوسنیو چارواکو سره د خبرو اجازه ورکړې.
علي امين ګنډاپور په پېښور کې د پاکستان دفاعي پوهنتون يوې غونډې ته ويلي، د افغانستان وضعيت مخامخ د خيبرپښتونخوا پر وضعيت اغېز کوي او له همدې امله کابل سره له خبرو پرته، سيمه ييز ثبات ناممکن دی.
د ګنډاپور په خبره، د افغانستان له چارواکو سره خبرې د اوږمهاله حللارې ترلاسه کېدو لپاره اساسي شرط دی او ادعا کوي چې د همدې حساسيت په درک کولو سره يې له مرکزي حکومت د خبرو اجازه ترلاسه کړې ده.
د خيبرپښتونخوا اعلی وزير علي امين ګنډاپور زیاته کړې: « د اوږدمهاله حل لپاره له افغانستان سره خبرې مهمې دي او دا د دې سبب شوه چې فډرالي حکومت په دې اړه زما وړانديز ومني.»
خو شنونکي د نوموړي د هوډ برعکس نظر لري. دوی که څه هم د قبايلي سيمو په ناامنيو کې د افغانستان حکومت مسوول نه بولي، خو دا د ګنډاپور مسووليت ګڼي چې له کابل سره هر ډول مسايل د پاکستان د مرکزي حکومت له ادرسه تعقيب کړي نه د ايالتي حکومت.
د سياسي چارو شنونکی فريدالله ځاځی وايي: « د پښتونخوا معاملات هم تر ډېره د پاکستان له حکومت سره دي، نو ښه به دا وه چې د پښتونخوا وزیر اعلی دا مسایل له مرکزي حکومت سره شریک کړي وای او بیا د مرکزي حکومت له لارې کابل سره په تماس کې شوي وای.»
ځيني نور شنونکي د ستونزو حل لپاره د افغان چارواکو او علي امين ګنډاپور ترمنځ خبرو ته خوشبين دي، خو په دې نه دي ډاډه چې ګوندې په پايله کې به يې د ګنډاپور په نوښت شوې پرېکړې پاکستان عملي کړي.
د سياسي چارو شنونکی شهسوار سنګروال وايي: « په پښتونخوا یا هم د پاکستان تر کنټرول لاندې بلوچستان او وزیرستانونو کې حالات دومره خراب دي چې پاکستان یې د کابو کولو وس نه لري؛ ځکه اوس دوی دا خبرې کوي.»
له دې وړاندې د پاکستان پخواني لومړي وزير عمران خان هم د خيبرپښتونخوا اعلی وزير امين ګنډاپور ته چې د نوموړي د ګوند مهم غړی دی، سپارښتنه کړې وه چې کابل ته لاړ شي او له موجوده چارواکو سره د خيبرپښتونخوا پر وضعيت خبرې وکړي.
عمران خان په قبايلي سيمو کې د وضعيت ښه والي لپاره د افغانستان پرحکومت سربېره، د يادو سيمو قومي مشرانو رول هم عمده ياد کړی او د مسليم ليګ (ن) ګوند په مشرۍ يې د پاکستان اوسني حکومت ته ويلي چې له دې حقيقت سترګې پټې نه کړي.
