هرکال د پسرلي موسم په رارسېدو سره ګل غونډۍ په ارغواني ګلونو پوښل کېږي. دا غونډۍ چې د پروان ولايت په مرکز چاریکارو کې د طبیعي ښکلاګانو له ډکې سیمې ګڼل کېږي، هر کال د پسرلي په موسم او په تېره بيا د اخترونو په څېر ځانګړو ورځو کې د هېواد له ګوټ ګوټ څخه د زرګونه سيلانيانو کوربه وي.
احمدالله او ملګري یې له غزني ولایت څخه د ګل غونډۍ سیل ته راغلي دي.
احمد الله د ګل غونډۍ د ښکلا او سیل په اړه وايي: « ما د ارغواني ګلانو نوم اورېدلی، خو لیدلي مې نه وو. لومړی ځل دی چې ګل غونډۍ کې یې وینم او خوند ترې اخلم. زه او ملګري مې چې کابل ته راغلو، بیا مو د ګل غنډۍ پوښتنه وکړه او بیا دلته راغلو. ډېر د خوښۍ احساس کوم، ښایسته ځای دی او په زړه پورې هوا لري.»
د هېواد له بېلابېلو ولایتونو یو شمېر راغلي سیلانیان چې ګل غونډۍ ته د مېلو او تفرېح لپاره ورغلي خوښ دي چې د اختر خوښۍ په امن او آرام طبیعت کې تېروي.
د کابل اوسېدونکی بشرمل وايي: « دلته راغلی یم چې د ګل غونډۍ له طبیعت خوند واخلم. دا ځای ډېر ښایسته طبیعت او هوا لري او ښه ډېر خلک ورته راغلي دي، زه خپل هېواد په برازیل نه ورکوم.»
د بغلان اوسېدونکی مبشر وايي: « له ملګرو سره ګل غونډۍ تپې ته راغلی یم. زما لومړی ځل دی او باید وایم چې ډېر ښایسته ځای دی. امنیت هم ښه دی او فرصت شته چې خلک سیل وکړي.»
د پکتیا اوسېدونکی عبدالغفور وايي: « ډېر ښایسته ځای دی، خوندوره هوا او ښه خلک لري. زموږ ډېر ساعت تېر شو او فضا پوره امن ده. موږ د پروان له خلکو ډېره مننه کوو چې د تفرېح او ساتېري زمینه یې برابره کړې.»
ځايي خلک هم چې په دغو ځانګړو ورځو کې د سیلانیانو لپاره خدمات وړاندې کوي او له همدې لارې یې کاروبار روان دی، له خپل کاربار او هلته د ډېرو سیلانیانو له ورتګ خوښ دي.
چای پلورونکی میرآقا وايي: « پرون مې له ۱۵ تر ۲۰ زرو افغانیو کار وکړ. څومره چې خلک ډېرېږي، زموږ فروشات هم ورسره ښه کېږي.»
ګل غونډۍ کې یو بل کاروبار لرونکی میلاد وايي: « زموږ فروشات ډېر ښه شوي، د نورو کالو په پرتله ډېر شوي دي.»
چای پلورونکی عبدالبشیر وايي: « دلته خلک سیل ته راځي او موږ یې خدمت کوو. هم د خلکو تفرېح وشي او هم زموږ لپاره مزدوري جوړه شي.»
ګل غونډۍ د پروان ولايت مرکز چاريکارو په لويديځ کې يوه له طبیعي منظرو او تفريحي سيمو ده چې په ۱۳۲۴ لمریز کال د افغانستان د یوه شاعر بهايي جان له خوا د ګل غونډۍ په نوم ونومول شوه.
د ارغواني ګلانو مېله چې هر کال په دې غونډۍ کې جوړیږي، د اطلاعاتو او فرهنګ وزارت له خوا ۱۲ کاله وړاندې پر رسمیت وپېژندل شوه.
