په ملګرو ملتونو کې د امریکا سفیره لینډا ټوماس ګرینفلېډ وايي، امریکا اسلامي امارت پر رسمیت نه پېژني او پر دوی به د بشري حقونو د نقض له امله فشار ته دوام ورکړي.
ګرینفلېډ وايي، امریکا له اسلامي امارت سره ځکه خبرې اترې کوي چې وشي کولی پر دوی د بشري حقونو اړوند مسایلو کې فشار راولي.
نوموړې رسنیو سره خبرو کې پر افغانانو او په ځانګړي ډول په نجونو او ښځو د اسلامي امارت د لګول شویو بندیزونو یادونه کړې او ویلي یې دي، چې امریکا اسلامي امارت پر رسمیت نه پېژني او هېڅکله ښوونځیو ته د نجونو د راګرځولو له پرېکړې ملاتړ نه کوي.
په ملګرو ملتونو سازمان کې د امریکا دایمي سفیره چې تازه د درېیم ځل لپاره د ملګرو ملتونو سازمان د امنیت شورا دوره يي مشره ټاکل شوې ژمنه کړې چې له بشر حقونو سرغړونې به وڅاري او افغانستان به یې د کارونو په لومړیتوب کې وي.
د نوموړې په وینا په افغانستان کې یې د بشر حقونو خوندیتوب په برخه کې هیڅ پرمختګ نه دی لیدلی او دغه هېواد کې رسنۍ ځپل شوي، نجونې له ښوونځیو او ښځې له کار راګرځول شوي، خو د کوکنارو د کښت د بندولو پرېکړه د پام وړ ده.
اسلامي امارت بیا تر اوسه پورې په ملګرو ملتونو کې د امریکا د سفیرې څرګندونو ته کوم غبرګون نه دی ښودلی.
