د امریکا سنا مجلس له افغانستان د سرتېرو ایستلو په تړاو له ولسمشر ټرمپ د وضاحت غوښتنه کړې.
امریکايي سناتور لېنډسي ګراهم له خبریالانو سره په خبرو کې ویلي؛ د امریکا ولسمشر باید سنا غونډې ته وروغوښتل شي او له افغانستان او سوریې څخه د سرتېرو وتلو په تړاو دې مالومات ورکړي.
هغه ویلي؛ په افغانستان کې وسله والو ډلو ماته نه ده خوړلي او د وتلو په صورت کې به دوی پر امریکا بیا بریدونه وکړي.
له دې سره د امریکا دفاع وزارت له افغانستانه د اووه زره ځواکونو د وتلو په اړه غور کوي.
یو شمېر امریکایي رسنیو د پنټاګون د چارواکو له قوله خبر ورکړی چې ولسمشر ټرمپ له سوریې وروسته په دې غور کوي چې په افغانستان کې هم د خپلو پوځیانو شمېر نمایي ته راکم کړي.
د امریکا د دې احتمالي پلان پر اساس په پام کې ده چې له افغانستان څخه تر راتلونکي اوړي پورې اووه زره پوځیان وایستل شي.
خو افغان حکومت وایي، د بهرنیو ځواکونو وتل د افغانستان د امنیت پر وضعیت بد اغېز نه شي کولای.
د ولسمشر ویاند هارون چخانسوري ویلي، په وروستیو څلور نیمو کلونو کې د امنیتي چارو مسوولیت په بشپړ ډول د افغانانو په لاس کې وو.
اوسمهال امریکا په افغانستان کې شاوخوا ۱۴ زره سرتیري لري .
طالبان بیا د سولې خبرو لپاره لومړی شرط د بهرنیوځواکونو وتل په ګوته کوي.
