د چاپریال ساتنې اداره وايي، تازه یې ځينې پروګرامونه پیل کړي، چې د ککړې هوا مخنیوی وکړي.
ککړه هوا پټ قاتل دی چې د مالوماتو له مخې، هر کال په افغانستان کې شاوخوا پنځه زره کسان په تدریجي توګه وژني.
چاپیریال ساتنې اداره وایي، د هوا د کیفیت مدیریت کې دې ټولې اړوندې ادارې لاس په کار شي او له دې وروسته دې ټول سوداګریز، اقتصادي، ترانسپورتي او ټولنیز فعالیتونه له یادې ادارې سره په همغږۍ وشي.
د چاپریال ساتنې اداره وايي، د هوا د کیفیت څارنې سیستم او د مسلکي او بشري ظرفیتونو نشتون د چاپیریال ساتنې اداره له ستونزو سره مخ کړې ده.
که څه هم د هوا ککړتیا نړیواله ستونزه ده خو افغانستان یې ځکه زیات زیانمنونکی دی چې دلته مسلکي ظرفیتونه او د هوا د کیفیت د څار منظم سیستم نشته او تر یو بریده ټولې اړونده ادارې خپلې چارې پرته له همغږۍ مخ ته وړي.
افغانستان ته پر واردېدونکو د سون توکو، نقلیه وسایطو، اقتصادي، سوداګریز او ټولنیزو فعالیتونو هم نیوکه ده چې د چاپیریال ساتنې په تړاو بې غوره دي.
په ټوله کې د افغانستان په لویو ښارونو کې د هېواد په کچه ۲۲ سلنه وګړي ژوند کوي او په کابل کې بیا د ټول هېواد په کچه ۱۴ سلنه چې ورسره هوا او اوبه خرابې شوي او تر اوسه مطلق اکثریت د چاپیریال پاک ساتلو په تړاو بې غوره دي.
چاپیریال ساتنې اداره اوس لاس په کار شوې چې څنګه کولی شي د ککړې هوا مخنیوی وکړي.
د کابل ښار په بیلا بیلو برخو کې شاوخوا لس دستګاوو ته اړتیا لري چې د هوا په تړاو مالومات راټول او په اړه اقدام وشي.
