له کډوالو او راستنېدونکو سره د مرستې د جلب او جذب کمېټه چې مشري یې د اقتصاد وزارت سرپرست کوي، د مرستو د جذب په موخه یې د ملګرو ملتونو اړوند ادارو، د کډوالو په چارو کې د ملګرو ملتونو سترې کمېشنرۍ، د ملګرو ملتونو پراختیايي ادارې (یو.اېن.ډي.پي)، اوچا ، آی.او.ایم ، یو اېن هبیتات او نورو مرستندویه نړیوالو ادارو له چارواکو او استازو سره ناسته کړې.
په دې ناسته کې ټینګار شوی چې پاکستان د کډوالۍ ټولو نورمونو او قوانینو خلاف افغان کډوال په اجباري توګه راشړي چې د چارواکو په خبره سرپرست حکومت کډوالو ته د اسانتياوو برابرولو په موخه لازم امکانات په کار اچولي، حخو د نړیوالو ادارو مرستو ته هم اړتیا ده.
په دې ناسته کې د اقتصاد وزارت سرپرست دین محمد حنیف تمه ښودلې چې نړیوالې ادارې به له راستنیدونکو افغانانو سره کافي مرستې وکړي.
په افغانستان کې د ملګرو ملتونو د بشري مرستو همغږي کوونکی دفتر(اوچا) وايي، د دوی د اټکل له مخې به دا ځل یو۱.۵ میلیونه افغانان له پاکستان بېرته هېواد ته راستانه شي چې په خبره يې ملګري ملتونه ورسره د مرستو لپاره چمتووالی لري.
په افغانستان کې د ملګرو ملتونو د بشري مرستو همغږي کوونکې انډریکا راټ واټ ویلي: « دا به مشکله وي چې ووایو څومره افغانان به راستانه شي؟ شمېر یې اوس موږ ته نه څرګندېږي، خو موږ له ۶۰۰ زرو تر ۱.۵ میلیونو کسانو لپاره چې بېرته راستنیدونکي دي، د مرستې چمتووالی نیولی.»
د کډوالو نړیوال سازمان بیا وايي، د خپل پلان پر اساس له راستنېدونکو سره د ټرانسپورټ او نورو برخو کې زرګونو افغانیو مرستو لپاره چمتوالی لري، خو په خبره يې که یې مالي ستونزې حل شي، دغه مرستې به نورې هم پراخې کړي.
په افغانستان کې د کډوالۍ نړیوال سازمان ریيس میا پارک وايي:« د خپل پلان پر بنسټ موږ له پاکستان او ایران د راستنېدونکو کډوالو سره به په میاشتنۍ کچه د دوی د لېږد را لیږد لپاره هرې کورنۍ سره له ۲۳ زره افغانیو نیولې تر ۴۶ زره افغانیو مرسته وکړو او که زیاته بودیجه ترلاسه کړو، د مرستو کچه به هم لوړه کړو.»
د ملګرو ملتونو د کډوالو ستره کمېشنري (یو.اېن.اېچ.سي.آر) بیا وايي، پر نړیواله کچه د ادارو مالي حالت ښه نه دی.
د چارواکو په خبره، دې چارې پر افغانستان هم اغیز کړی. دوی زياتوي، د خپلو موجوده مالي امکاناتو پر اساس به د افغان کډوالو ستونزې ورحل کړي.
په افغانستان کې د کډوالو سترې کمېشنرۍ استازی عرفات جمال وايي: « غواړم د بوديجې حالت په اړه وضاحت ورکړم. تاسو ټولو ته واضحه ده چې د نړۍ پر کچه د نړیوالو ادارو مالي وضیعت ښه نه دی او دې حالت پر افغانستان هم اغېز کړی او موږ چې کومه محدوده بوديجه د پروګرامونو لپاره په پام کې نيولې، هڅه کوو چې د افغانستان ستونزو ته ترممکنه حده رسیدنه وکړو.»
دا په داسې حال کې ده چې پاکستان یوځل بیا د افغان کډوالو د جبري ایستلو لړۍ پیل کړې او تر اوسه یې نږدې ۲۰ زره کډوال په جبري توکه را ایستلي دي.
اسلامي امارت بیا د بېرته راستنېدونکو کډوالو د ستونزو د حل لپاره ځانګړی کمیسیون جوړ کړی چې ۱۲ کاري کمېټې لري.
دغه کمېټې د کډوالو لنډه مهال پنډغالي، ټرانسپورټ، د مرستو جلب او جذب او دېته ورته نورو برخو کې پر کار بوختې دي.
