د عثمان په نوم کونړی ماشوم د ماښام په تیاره کې د څښاک په وسیله تر بې هوښه کولو وورسته، د خپل کور له دروازې تښتول شوی.
پلار یې وايي، د اسعد اباد پر نواباد د شپې څادر په خورېدو و او له بهره په ستړو ګامونو کور ته راغی، غوښتل یې له زوی سره د ورځې ستړیا په لوبو او خبرو دمه کړي، خو ناخبر له دې چې زوی يې نه شته.
شپه يې د عثمان پيدا کولو لپاره په منډو تېره کړې، خو يکشنبه غرمه مهال يې جسد په داسې حال کې پيدا کوي چې خېټه يې څېرې شوې، د جومات له بامه له را غورځولولو وروسته پرې د سيمنټو تيږي هم راغورځول شوې دي.
د عثمان پلار محمد یوسف وايي: « له والي نیولې تر امنیه قوماندان او د حوزو تر مسوولینو، پر ټولو چارواکو غږ کوم چې زما د شهید کړای شوي زوی قاتلین ونیسي، د خپل عمل سزا ورکړي، ترڅو د نورو لپاره عبرت شي.»
کليوال يې پر مرګ خواشيني دي او وايي، دغه ماشوم نه دا چې بې ګناه و بلکې په ډېرې بې رحمۍ وژل شوی او قاتلانو ته يې د سختې سزا ورکولو غوښتنه کوي.
د کونړ اوسېدونکی بخت جان وايي: « په نواباد کې چې کوم ماشوم په ډېره بې رحمۍ وژل شوی، د ده قاتلین دې ونیول شي او سخته سزا د ورکړل شي.»
د کونړ اوسېدونکی نور الرحمن وايي: « له دې ماشوم سره ډېر زیات ظلم شوی. موږ له چارواکو غوښتنه کوو چې دا مجرمان دې ژر تر ژره ونیسي او داسې سزا د ورکړي چې بل څوک بیا جرئت ونه کړي.»
د عثمان پر جسد د شکنجې له نښو ښکاري چې په بې رحمۍ وژل شوی. امنیتي مسوولینو د پېښې څېړلو او د قاتلانو نیولو ډاډ ورکړی، خو له خلکو هم په دې برخه کې د همکارۍ غوښتنه کوي.
د کونړ امنیه قومندانۍ ویاند فرید دهقان وايي: « د پېښې په اړه تحقیقات روان دي او ټولې ادارې هڅه کوي اړین ګامونه پورته کړي، ترڅو عدالت تأمین او یقیني شي. موږ د دې شهید ماشوم له کورنۍ او خلکو غوښتنه کوو چې په دې اړه له امنیتي ځواکونو سره همکاري وکړي.»
د کليوالو د معلوماتو له مخې، د عثمان پلار له هېچا سره شخصي دښمني نه لري او له همدې امله د عثمان پر مرګ د خفګان ترڅنګ، د نوموړي بې رحمانه وژلو انګېزې حيران کړي دي.
