په کونړ کې د داعش حضور خطرنګ لورته روان دی.
د کونړ ولایت خلک وایي، وروستیو کې د نورو وسله والو ډلو سربېره د داعش فعالیتونه زیات شوي او په باور یې که مهار نه شي، حکومت او ولس ته لوی سرخوږی جوړولی شي.
دوی وایي، حکومت دې د وسله والو ډلو ترمنځ د خپلمنځي جګړو ننداره نه بلکي د ځپلو لپاره دې یې لاس پکار شي.
داعش او طالبان یوازې په خپلو منځو کې جګړې نه کوي.
ددې سیمې ځایي خلک وایي، وخت ناوخت دافغان امنیتي ځواکونو په پوستو هم بریدونه کوي، چې قربانیان یې پر ځواکونو سر بېره عام خلک هم وي.
تر نورو بیا ډېر د امنیت په برخه کې د ناړۍ ولسوالۍ خلک له حکومت ګیلې لري.
دوی وایي، د نا امنیو او جګړو قرباني دي؛ خو په خبره یې څوک یې د غږ اورېدو نشته.
د ولس استازي هم دولس خبرو ته قوت ورکوي او اندېښنې یې پر ځای ګڼي.
د ولسي جرګې غړی جاوید ساپی وایي، نا امنۍ د کونړ مرکز اسعد اباد ته رسېدلي او دا د چارواکو بېغوري بولي.
د کونړ ځايي خلک وایي، که وضعیت همداسې دوام وکړي کونړ به نږدې راتلوونکي کې له ډېرو نورو بدبختیو سره مخ شي.
کونړ کې ۱۷ حکومت ضد وسله والې ډلې شتون لري او هر وخت نا امنیو ته کار کوي.
د امنیه قومندانۍ د امنیت امر سمونوال محمد یوسف بیا د خلکو له نیوکو سره سره هم وسله والې ډلې ځپېدلې یادوي او وایي، د پرمختګ وس هیڅ نه لري.
خو ولسونه بیا د چارواکو له خبرو سره په یوه نظر نه دي او اندېښمن دي، که چیرې وضعیت همدا ډول ادامه پېدا کړي، نو داعش ډله به د کونړـ جلال اباد لويه لاره هم قطعه کړي.
