د یکشنبې شپه د ټول ختیځ لپاره مرګونې او د سلګونه انسانانو لپاره تر خاورو لاندې د ژوند وروستۍ شپه وه.
د ریښتر په کچه ۶.۴ درجې زورورې زلزلې د کونړ، ننګرهار، لغمان، نوروستان او پنجشیر ولایتونو ځينې سیمې ولړزولې او له ځاني زیان سربیره یې په پراخه کچه مالي زیانونه هم واړول.
د کونړ اوسېدونکی ځدران وايي: « تر اوسه مو جلال آباد ته سلګونه ټپیان لېږدولي او سلګونه نور کسان تر خاورو لاندې پراته دي. زموږ د نورګېل ولسوالۍ اکثریت کلي زلزلې ویجاړ کړي دي.»
په زلزله کې د قرباني شوې کورنۍ یو تن غړی وايي: « زما د کورنۍ اکثریت غړي شهیدان شوي. د یوه وراره مې ښځې او بچي شهیدان دي، هلته مې ورینداره سره له ماشومانو شهیدان شوي، هغه بل کور کې مې یو وراره او دوې ورېرې شهیدانې شوي، کورنه ټول ویجاړي دي او مړي هلته پراته دي. بس د الله امر و او راغی په موږ وشو.»
ځايي مسوولین وايي، له پېښې سره سم یې د ځمکې له لارې ژغورونکې ټیمونه او د بېړنیو مرستو کاروانونه رسولي او ګڼ شمېر شهیدان او ټپیان یې له خاور ایستلي دي.
د ننګرهار د عامې روغتیا ریيس مولوي امین الله شریف وايي: « کله چې موږ بېګا شپه خبر شو چې زموږ پر هېوادوالو زلزله راغلې، له ځان سره مو تر ۵۰ امبولانسونه را واخیستل او حرکت مو وکړ. د سهار لمانځه مهال د زلزلې سیمې ته را ورسېدو. اوس زموږ هوايي او ځمکني ټیمونه لګیا دي او د ژغورني عملیات ترسره کوي؛ خو لاهم ډېر خلک تر خاورو لاندې پاتې دي او ډېر کار ته اړتیا ده.»
د ننګرهار هوايي ډګر کې د ملي دفاع وزارت هوايي ځواکونه په هیلکوپټرو کې د زلزلې قربانیان، مړي، ټپیان او مرستندویه توکي لېږدوي.
رسمي تایيد شوي معلومات چې د ډېرېدو او تغییر وړ دي، په دې پېښه کې د ۸۷۰ تنو شهیدانو او ۲۷۵۹ تنو ژوبلېدو پخلی کوي. د دغو شمېرو له مخې، یوازې په کونړ ولایت کې ۸۰۰ تنه چې ډېری یې ښځې او ماشومان دي شهیدان شوي دي.
د اسلامي امارت ویاند ذبیحالله مجاهد وايي: « په کونړ کې په عمومي ډول تر اوسه پورې د ۸۰۰ تنو شهیدانو راپور لرو(انا لله و انا الیه راجعون). همدارنګه ۲۵۰۰ تنه ژوبل شوي. د پېښې محل نورګېل، څوکۍ، وټه پور، ماڼوګي او چپه دره ولسوالۍ او ځینې نورې سیمې دي. د نورګېل ولسوالۍ مزاردره کلي ته د ژغورنې ټیمونه رسېدلي، خو تر اوسه یې د مرګ ژوبلې جزئیات نه دي رسېدلي، چې ښايي د مرګ ژوبله کچه لوړه کړي.»
د وړمې شپې زلزلې د مرګ ژوبلې له ډلې په کونړ کې ۸۰۰ تنه شهیدان، ۲۵۰۰ تنه ټپيان دي، په ننګرهار کې ۱۲ تنه شهیدان او ۲۵۵ ټپيان دي، په لغمان کې ۵۸ تنه ټپیان او نورستان کې ۴ تنه ټيپان شوي دي.
په دې مرګونې پيښې د هېواد دننه افغانانو سربېره په نړیواله کچه هم خواشيني ښودل شوې او د ملګروملتونو د سرمنشي په شمول د ګڼو هېوادونو لوړ پوړو چارواکو یاده پېښه یوه غمیزه بللې ده.
زلزله ځپلو سیمو کې لاهم دولتي او غیردولتي ژغورندویه او د مرستو رسوونکو ډلې لګیا دي او ترخاورو لاندې ټپيان او جسدونه را اوباسي.
