د امریکا پوځ مرکزي قوماندانۍ قوماندان مایکل کوریلا وایي، له افغانستانه د احتمالي ګواښونو د مخنیوي په هدف غواړي د دغه هېواد پر فضا خپل استخباراتي څار ډېر کړي.
کوریلا کانګرېس ته په استماعيه غونډه کې ادعا کړې، چې له افغانستانه د امریکا او متحدانو اهدافو د برید احتمال مخ پر ډېرېدو دی.
نوموړي خبرداری ورکړی، چې ښایي داعش په راتلونکو شپږو میاشتو کې پر امریکا او اروپایي هېوادونو د برید کولو وړتيا ترلاسه کړي.
کوریلا وايي: « سږ کال داعش په سوریې او عراق کې خپلو بریدونو ته زور ورکړی او د لازیاتو بریدونو ګواښ، چې له افغانستانه سرچینه اخلي د زیاتېدو په حال کې دی. د داعش خراسان څانګه خپل ځواک راټولوي او په راتلونکو شپږو میاشتو کې به له کوم خبرداري پرته د امریکا او غرب پر ګټو برید وکړي.»
خو د اسلامي امارت ویاند ذبیح الله مجاهد د دې په غبرګون کې يادې څرګندونې ناسمې او له حقیقته لري بولي او زياتوي چې داعش په افغانستان کې تر دې حده ځپل شوې، چې د بيا انسجام وړتيا نه لري.
مجاهد وايي: « دغه ادعا ناسمه ده. له بده مرغه په امریکا کې اوس هم هغه کړۍ چې د جنګ پلوې وې او د اشغال تر شا ولاړې وې، په جنګ کې یې ګټې وې اوس هم پروپاګند کوي او هڅه کوي چې د افغانستان په اړه د خلکو ذهنیت خراب کړي. په افغانستان کې موږ وضعیت وینو او نړۍ یې هم مشاهده کولی شي چې دلته هېڅ خپلسرې ډله وده کولی نه شي او نه شته دی. د داعش پروژه د اشغال په وخت کې د امریکایانو لخوا حمایه کېدله او اوس دا ډله ځپل شوې، له منځه تلې ده او د نابودۍ په سرحد ولاړه ده.»
کارپوهان د سنټکام دا ډول څرګندونې د امریکا استخباراتي لوبه بولي او زیاتوي، چې امریکا د ورته مسايلو په مطرح کولو سره غواړي خپل فشارونه پر افغانستان زیات او په دوامداره توګه اعمال وساتي.
د پوځي چارو کارپوه اخترمحمد راسخ وايي: « دغه اطلاعات چې کانګرس ته وړاندې کېږي، د طالبانو او افغانستان د جغرافیې په هکله د کانګرس تصمیم لپاره دا خپله د پاکستان د استخباراتو اطلاعات، مبارزه او کړنه ده، چې له طالبانو سره دوه مخې لوبه کوي.»
د سیاسي چارو کارپوه محمد زلمی افغانیار وايي: « په دې شرایطو کې چې پر افغانستان یې په عملي ډول اقتصادي او سیاسي فشارونه وارد کړي د امریکا دغه ډول ادعاوې سیاسي موخې لري. تل یې له دغه ډول ډلو سره د مبارزې لپاره د سیمې او نورو هېوادونو ته خپلې لښکرې وروستي او په افغانستان کې هم ۲۰ کاله پاتې شول؛ نو که د دې ډلې په اړه یې اندېښنه درلوده باید پر وړاندې یې مبارزه کړې وه. نن که دوی پر دغه ډول موضوعګانو بحث کوي موخه یې دا ده چې پر اسلامي امارت زیات فشار راوړي.»
د ملګرو ملتونو سرمنشي انټیو ګوټیرېش تېره اوونۍ په خپل ۱۶ مخیزه راپور کې ویلي، د وړم کال پرتله تېر کال په افغانستان کې ۳۸ سلنه امنیتي پېښې زياتې شوي، خو اسلامي امارت يې په غبرګون کې دا ډول مالومات د ځینو استخباراتي کړیو کار بللی او له ملګرو ملتونو يې وغوښتل چې په خپلو راپورونو کې له دقت او بې پرېتوبه کار واخلي.
