هند کې یوې جوړې د کورونا وبا بندیزونو له امله د واده خپل مراسم په هوا کې ترسره کړل او له ۱۶۰ زياتو مېلمنو په کې ګډون کړی وو.
د هندوستان ټايمزورځپاڼې د راپور له مخې،د سپايس جټ هوايي شرکت دې الوتکې د تامل ناډو ايالت له مادورای سيمې بنګلور ته الوت کړی و او د واده مراسم هغه وخت ترسره شول،چې الوتکې د ميناکشي امان د تاريخي مندر پر سر الوت کاوه.
دا په داسې حال کې ده،چې په هند کې د کورونا وبا د نوې څپې له امله په ډېرو ایالتونو کې په ودونو کې تر ۵۰ زياتو مېلمنو ته د ګډون اجازه نه ورکول کېږي.
بل پلو د هوايي چلن ادارې په دې اړه د پلټنو لارښوونه کړې او د الوتکې د عملې دندې یې ځنډولي دي.
په وروستیو کې هند کې د کورونا وبا مثبتو پېښو زياتېدو له امله بندیزونه لګول شوي دي.
د مالوماتو له مخې، هلته پر کورونا وبا د اخته کسانو شمېر له ۲۶ میلیونو لوړ شوی او څه باندې ۳۰۷ زره کسان ترې مړه شوي دي.
هند د امریکا له متحده ایالتونو وروسته نړۍ کې دویم هېواد دی، چې کورونا وبا سخت ځپلی دی.
