د هند روغتیا وزارت وایې، په تېرو ۲۴ ساعتونو کې د کورونا وبا له امله ۴۴۵۴ کسان مړه شوي، چې په دې سره د ټولو مړو شمېر له ۳۰۰ زرو واوښت.
خو کارپوهان بیا وایې، هلته د کورونا وبا له امله د مړېنې شمېره له دې هم ډېره لوړه ده.
هند کې پر کورونا وبا د اخته کسانو شمېر له ۲۶.۷ میلیونو پورته شوی او دا په نړۍ کې د امریکا له متحده ایالتو وروسته دویم هېواد دی، چې ډېر کسان په کې پر کرونا اخته شوي دي.
کورونا وېروس د لومړي ځل له پاره د ۲۰۱۹ زېږدیز کال په ډسمبر میاشت کې د چین مرکزي هوبي ولایت په ووهان ښار کې پیدا شو.
د جانس هاپکنز پوهنتون د مالوماتو له مخې، ټوله نړۍ کې پر کورونا وبا د اخته کسانو شمېر له ۱۶۷ میلیونو لوړ شوی او څه باندې ۳.۴ میلیونه کسان ترې مړه شوي دي.
