د کورنیو چارو وزارت په تدارکاتي، بشري سرچینو او لوژستیک برخو کې ستونزې شته چې باید حل شي.
د اداري فساد بر وړاندې د مبارزې ګډه کمېټه وایي، کورنیو چارو وزارت ته یې په ټوله کې د چارو د سمون په موخه ۵۶ سپارښتنې کړي چې درې یې عملي شوي دي.
کورنیو چارو وزارت هم منلې چې ستونزې شته او یادونه یې کړې چې د حل په موخه به یې شته قوانین او مقررات عملي کړي.
د اداري فساد پر وړاندې د مبارزې ګډه کمېټه د هرې ادارې د ستونزو او د حل لارو په تړاو څېړنه کوي چې دا ځل یې د کورنیو چارو وزارت درې برخې، تدارکاتي، بشري سرچینې او لوژستیک برخه ارزولې ده.
دغې ادارې له فساد سره د مبارزې لپاره کورنیو چارو وزارت ته ۵۶ سپارښتنې کړې وې چې درې یې پلې شوي، ۲۸ یې د تطبیق په حال کې دي او پنځه هغه یې د ځینو تغیراتو له امله ارشیف شوي دي.
نیوکه دا ده چې د کورنیو چارو وزارت د تدارکاتو برخه کې به قرارداد ته یوازې څو محدودو کسانو لاس رسی درلود، چې د سپارښتنو وروسته ورته اوس هر څوک لاس رسی لري.
له دې سره کورنیو چارو وزارت هم منلې چې په دغه برخو کې ستونزې شته او ژمنه یې کړې چې د قوانینو او مقرراتو په پلې کولو سره به یاده ستونزه حل کړي.
