د کورنیو چارو وزارت د لومړي ځل لپاره د جنايي تخنیک(کریمنال تخنیک) ریاست اړوند د بیولوژیکي لابراتوار او د جنیټکي اطلاعاتو(ډياېناې) په مدیریت کې د چټک پېژندنې سیستم فعال او ګټې اخستنې ته وسپاره.
د دې سیسټم د فعالولو په مراسمو کې د کورنیو چارو وزارت ویاند ویلي چې فعالول یې د مجرمینو لپاره د خطر زنګ دی او په اسانه به جرم ته زړه ښه نه کړي.
د کورنیو چارو وزارت ویاند مفتي عبدالمتین قانع وايي: « دا به د مجرمانو لپاره د خطر زنګ وي. زموږ مسلکي ټیم به د جرم او جنایت په څېړلو، د مجرمانو په نیولو او د جرم کچې په ټيټولو کې ډېر اغېزناک تمام شي.»
په دې مراسمو کې د چارو ا دارې رییس دا یو ستر پرمختګ بللی او په خبره یې، له مظلوم سره مرسته ده، ترڅو د ظلم مخنیوی وشي.
نور الحق انور وايي: « دا یو عادی شی نه دی بلکې د اغېز او پایلې له پلوه لوی پرمختګ دی. له دې سره به ډېرې بد امنۍ او جرایم کم شي او ظالمانو ته به د هغوی د ظلم سزا ورکړل شي.»
د کورنیو چارو وزارت اداري معین رحمت الله نجیب وايي: « اوس الحمد الله دا اسناد هم مجود شول. دا پرمختګ چې موږ وینو، له موږ سره د الله تعالی لوی نصرت دی. تېر نظام د پیسو او متخصصانو له لرلو سربېره دا سیسټم نه شو فعالولی.»
دا ډول سیسټمونه چې د جرایمو د تشخیص په موخه کارول کېږي او حق د باطل پر وړاندې په ښکاره معلوموي، تر ډېره د هېوادوالو له هرکلي سره هم مخ شوي. د حقوقي چارو یوشمېر شنونکي هم د دې سیسټم له فعالېدو هرکلی کوي.
د حقوقي چارو شنونکی اسماعیل ځدراڼ وايي: « دوی کولی شي د دې سیسټم له لارې هغه مجرمان ونیسي چې افغانستان کې یې جرم کړی. دوی به د مجرمانو ډياېناې اخلي او ټول معلومات به یې چک کوي.»
د ډياېناې چټکې پېژندنې سیسټم د جرمونو په کشف کې د دقت لوړولو، د مجرمینو په پېژندنه، د بېګناه کسانو په ملاتړ او عدلي او قضايي مراجعو ته د علمي او باوري شواهدو په وړاندې کولو سره د هېواد د تخنیکي ظرفیتونو د پیاوړتیا او د عدالت د تأمین بهیر د لا پیاوړتیا په برخه کې یو مهم ګام بلل کېږي.
