د اروپا مېشتو افغان علمي او فرهنګي شخصیتونو يو ۱۲کسیز پلاوی د اسلامي امارت چارواکو سره د ليدنو لپاره کابل ته راغلی دی.
د کورنیو چارو وزارت سرپرست سراج الدین حقاني ياد پلاوي سره کتلي او پر مهمو مسايلو یې خبرې کړې دي.
د حقاني په خبره نړيوال باید نور دا حقیقت ومني او عادت شي چې افغانستان یو خپلواک هېواد دی او د هېڅ چا لاسوهنې نه مني.
حقاني زیاته کړه:« د ټولشموله نظام او دې ته ورته بحثونو په اړه باید ووایم، دنیا باید نور دا حقیقت ومني او دې سره عادت شي چې افغانستان یو خپلواک هېواد دی، همداسې چې د نورو په کورنیو چارو کې مداخله نه کوي، دا نه خوښوي نور ورته داسې فرمایش ورکړي چې زموږ ملي حاکمیت سره پخلا نه وي.»
د ډاکټر روهي په مشرۍ راغلي پلاوي د ا.ا.امارت تر واکمنېدو وروسته د ډاډمن سرتاسري امنیت، نشه یي موادو پر وړاندې اغېزمنه مبارزه او نورو برخو کې پرمختګونه وستایل او ټينګار يې وکړ چې دا لاسته راونې بايد وساتل شي.
روهي زیاته کړې:« تر جګړو وروسته د تېرې ترخې زمانې هېرول، په واقعي مانا د يو بل زغمل او منل، د ښځینه او نارينه و د زده کړو کمي او کیفي لوړوالی، مسلکي خلکو ته د فرصت په سپارلو سره پرمختګ او ثبات ته لار هوارول او نړۍ سره تعامل به افغانستان په ښه مسیر کې واقع کړي.»
دغه راز سراج الدين حقاني ویلي، افغانان له څو لسيزو سختې مبارزې وروسته خپلو اساسي هيلو ته چې آزادي، د خپل وطن مالکیت او اسلامي نظام قیام و، ورسيدل او ټول لوري بايد اوسمهال له رامنځته شوي فرصت څخه د ھېواد د آبادۍ او پرمختګ په موخه کار واخلي.
هغه زیاته کړه:« موږ نړۍ سره په متقابل احترام ولاړ تعامل غواړو، د ا.ا.ا مشرتابه په اختریز پیغام کې ټوله دنیا په واضح ډول ښو اړیکو ته دعوت کړه. د تعلیم بحث موږ پورې اړه لري، موږ خپله یې زمینه برابرو؛ ځکه چې دا زموږ د خپلو بچیانو مساله ده او هېڅوک زموږ په اولادونو تر موږ ډېر مهربان نه دي.»
د کورنيو چارو سرپرست وزير د اروپا د مېشتو افغان علمي او فرهنګي شخصیتونو دغه پلاوي ته ويلي چې دولت دروازې د ټولو خیرخواهانو پر مخ خلاصې دي او ډاډ یې ورکړ چې د هېواد پر کچه د ستونزو د حل لپاره به خپلې هڅې جاري ساتي.
