د افغانستان کورنیو چارو وزارت وايي، د لاسه وتلو سیمو او ولسوالیو د بېرته نیولو لپاره جوړ شوی پلان د عملي کېدو په حال کې دی.
د یاد وزارت مرستیال ویاند احمد ضیاء ضیاء وايي، د سرپرست وزیر په مشرۍ هرات ته تللی پلاوی هم په همدې موخه هلته مېشت دی،ترڅو هغه ولسوالۍ چې طالبان پرې حاکمیت لري بېرته یې ونیسي او د عملیاتو په لړ کې تازه د هرات کرخ ولسوالۍ بېرته د افغان ځواکونو لاسته ورغلې ده.
ضیاء زیاته کړه:«د کورنیو چارو سرپرست وزیر اوس مهال په هرات ولایت کې دی. د عملیاتي برنامو پلې کولو لپاره یې خپل کار پیل کړی دی. افغان امنیتي او دفاعي ځواکونو د عملیاتي برنامو له مخې، د کرخ ولسوالۍ بېرته نېولو لپاره عملیات پيل کړي،چې په پایله کې یاده ولسوالۍ د طالبانو له شتونه پاکه شوې. زموږ دا عملیات به د هرات نورو سېمو ته هم پراخه شي.»
افغان حکومت په داسې مهال د ولسوالیو بیرته نېولو اقدام کوي،چې په تېرو دوه میاشتو کې نږدې دوه سوه ولسوالۍ د طالبانو لاسته لوېدلې دي.
په همدې حال کې د ولسي جرګې غړي د جګړې د دوام پرځای د سولې خبرو په بیا پيل ټېنګار کوي.
د ولسي جرګې غړی ګل الرحمان همدرد وايي:« دوی باید تاریخ ته کتنه وکړي. یوه وخت کې له طالبانو سره د افغانستان ۹۰ سلنه خاوره وه، خو بیا هم دوی ګټونکي نه ول. اوس باید دوی هغه ترخه تجربه تکرار نه کړي. دوی باید سولې ته غاړه کېږدي، افغان حکومت او طالبان دواړه، خو یو شی ډېر مهمه ده، چې زه دومره غواړم، ته دومره غواړې، نور دا د دې وخت نه دی.»
ځیني نور بیا د سولې له روان بهیر ناهېلي دي او نېوکه یې پر ځینو سیاسیونو ده، چې هڅې یې رېښتوني نه دي.
د ولسي جرګې غړی محمد رفیع مموزی وايي:« زموږ ډېری سیاسیون دواړو اړخونو ته د دوی خپلې شخصي منافع دي، زیان یې ډېر زیات ولس ته اوړي.د افغانستان مظلومو خلکو ته اوړي. زغمل یې ډېر سخت دي.»
مسوولین وايي،د هرات له کرخ ولسوالۍ له نېول کیدو وروسته یې د کاپیسا په نجراب ولسوالۍ کې هم د وسله والو پرضد عملیات پیل کړي،زیاتې سیمې نیولي دي خو وسله والو طالبانو دغه ادعا رد کړې ده.
