د کوچني اختر په درېیو ورځو کې له بېلابېلو ولایتونو پلازمېنې کابل ته ګڼ شمېر کسان راغلي او دلته په مېلو او سیاحت بوخت دي.
کابل ته راغلي خلک وايي، د اختر ورځې یې په بشپړ امنیت کې تېرې شوې.
د پکتیکا اوسېدونکی محمد انور وايي:« موږ په اختر کې له پکتیکا څخه کابل ته په چکر راغلي یو. د امنیت له ټینګښت ډېر خوښ یو. له پکتیکا تر دې ځایه هېڅ ډول ستونزه رامنځته نه شوه او وخت مو په ډېره خوشالۍ تېر شو.»
د دایکنډي اوسېدونکی مهدي وايي: « له دایکنډي څخه د کابل ښار بابر بڼ ته د تفرېح لپاره راغلی یم. له اسلامي امارت مننه کوو چې د اختر په رخصتیو کې یې ښه امنیت نیول یو.»
په ورته وخت کې یو شمېر کابل ښاریان د اختر په ورځو شپو کې د امنیت د تامین په برخه کې د امنیتي ځواکونو هڅې ستايي او خوښ دي چې د اختر ورځې په ښارګوټو او تفریحي ځایونو کې په پوره امن ونمانځل شوې.
دوی له پوليسو سره پر همکارۍ د ټينګار ترڅنګ له اړوند ارګانونو غواړي چې په نورو ورځو کې هم امنيتي تدابير زيات کړي.
د کابل ښار اوسېدونکی اېمل وايي: « د اختر په درېیمه ورځ هم امنیتي ځواکونو ډېره ښه او منظم تدابیر نیولي او د خدای شکر دی چې تر اوسه هېڅ ډول واقعه نه ده پېښه شوې.»
د کابل ښار بل اوسېدونکی فیصل وايي: « موږ دلته په چکر راغلي یو. امنیت په ډېره ښه بڼه نیول شوی دی.»
د کابل اوسېدونکی جعفر وايي: « د اختر ورځې ښې وې او ښه امنیتي تدابیر نیول شوي وو. د اختر رخصتۍ په خوښۍ او آرامۍ تېرې شوې.»
په ورته وخت کې امنیتي مسوولین د امنیت د لا ټينګښت او د پېښو مخنیوي په برخه کې تطبیق شوی ځانګړی پلان بریالی بولي او د لا ښه امنیت برخه کې امنیتي ځواکونو سره د ښاریانو همکاري اړینه ګڼي.
د کابل ښار د اوومې حوزې د ټولي قوماندان ریحان وايي: « موږ په تېرو درېیو ورځو کې شپه او ورځ د خلکو خدمت وکړ او الحمد الله هېڅ پېښه نه ده شوې. موږ امنیتي ګزمې او چک پاینټونه درلودل او هېڅ ډول ستونزه نه شته.»
د اسلامي امارت سرتېری هجران وايي: « موږ د اختر په درېیو ورځو او شپو کې رخصت نه دی کړی او کور ته نه یو تللي، بلکې د خلکو په خدمت کې یو.»
سرتېری الهام وايي: « دلته هرڅه منظم دي، پیره، ګزمې او چک پاینټونه فعال دي. خلک هم راضي دي او څه امنیتي پېښه نه ده شوې.»
له دې ټولو سره، د کورنیو چارو وزارت ویاند عبدالمتین قانع وايي، امنیتي ځواکونو د اختر په درېیو ورځو کې د ټول هېواد امنیت په بشپړه توګه تأمین کړی و.
نوموړي د امنیتي ځواکونو له خوا په راتلونکي کې هم د خلکو د امنیت ساتلو ډاډ ورکړی.
