په افغانستان کې د يوې برېټانوۍ جوړې زنداني کېدو بحث يو وار بيا د ځينو رسنيو د راپورونو برخه ګرځېدلې او کورنۍ يې ادعا کوي چې له خيريه کارونو پرته یې په افغانستان کې نور څه فعاليت نه درلود.
۷۹ کلن پيټر رينولډز او د هغه ۷۵ کلنه مېرمن باربي د فبرورۍ په لومړیو کې له باميانو ولایت کې ونیول شول.
د کورنيو چارو وزارت ویاند عبدالمتین قانع وايي، يادې جوړې د افغانستان پېژندپاڼه او پاسپورټ لرل او اوس دا قضيه په دې موخه څېړل کېږي چې دې ښځې او خاوند د افغانستان تابعيت څه ډول ترلاسه کړی؟
قانع په دې اړه وايي: « د دغو بهرنیو بندیانو متعلق باید دومره ووایم چې دوی بریټانویان دي او د جمهوریت ادارې په وخت کې یې افغاني تذکره او پاسپورټ جوړ کړي دي. له دوی سره درېیم کس هم امریکايي الاصل ترجمان و. دوی د ځینو ملاحظاتو له امله نیول شوي او دوسیه یې محکمې ته سپارل شوې. له دوی سره به شرعي چلن کېږي.»
د يادې برېټانوي جوړې په اړه وړاندې په راپورونو کې ويل شوي چې له شاوخوا ۱۸ کلونو راهيسې یې په افغانستان کې ژوند کړی او د تعليم ترڅنګ يې د سوداګرۍ په برخه کې هم د مشورو وړاندې کولو موسسه درلوده.
د سارا په نوم د دې جوړې يوې لور رسنيو ته ويلي، په افغانستان کې يې د بندي مور او پلار روغتيايي وضعيت ښه نه دی او دوی یې په اړه اندېښنه لري.
خو سرپرست حکومت هغه مهال ډاډ ورکړی و چې قضيه به يې په عادلانه توګه وڅېړل شي.
د سیاسي چارو شنونکي هم غوښتنه کوي چې د نيول شویو بریټانويانو قضيه دې داسې وڅېړل شي چې پر افغانستان د بهرنيو وګړو باور زيانمن نه شي.
د سیاسي چارو شنونکی فیض محمد ځلاند وايي:« خلک پر دغو ګرځندویانو او سیلانیانو د جاسوسانو تور پورې کوي، ماته ښکاري چې دا ښه ټکی نه دی او دا د افغانستان د دوښمنانو تبلیغات بولم. دا هغه تبلیغات دي چې غواړي دغه تګلاره له خنډ او ځنډ سره مخ کړي. موږ په دې وروستیو کې د کابل پوهنتون کې د لیسانس پر کچه د ګرځندوی پوهنځی رامنځته کړ.»
د سیاسي چارو شنونکی اخترمحمد راسخ وايي: « د سیاست وېزې په چوکاټ کې د دغو کسانو سفرونه له نړیوالو اصولو سره سمون لري، خو باید ووایم چې دا د دولت دارانو او مسوولینو دنده ده چې د دغو اتباعو سیاحتي شرایطو ته په درنښت او احترام د امنیت، سفر او ګرځېدلو فضا مساعده کړي.»
د اقتصادي چارو شنونکي د سيل او چکر لپاره افغانستان ته د بهرنيو وګړو راتګ مهم بولي او زياتوي چې دا کار د سرپرست حکومت باور زياتولو ترڅنګ د افغانستان اقتصاد لپاره هم مهم او حياتي دی.
د اقتصادي چارو شنونکی نورالله عزیز وايي: « افغانستان ته د بهرنیو وګړو راتګ که په هره بڼه او شکل وي، د افغانستان پر اقتصاد اغېز لري. دغه کسان هېواد ته بهرني اسعار راوړي او په وسیله یې د هېواد په داخل کې توکي اخلي، د اوسېدلو لپاره ځای نیسي، له ټرانسپورټي وسایطو استفاده کوي او ترڅنګ یې له خدماتو په مناسبه بیه د خپلو ورځنیو چارو لپاره کار اخلي.»
د راپورونو له مخې، پيټر رينولډز او مېرمن یې د بريتانیا په بات پوهنتون کې سره اشنا شوي وو او په ۱۹۷۰ کال کې يي په افغانستان کې واده وکړ.
خو په افغانستان کې يې په مسلسله توګه د اوسېدو شاوخوا ۱۸ کاله کېږي او واک ته د سرپرست حکومت له رسېدو سره هم په افغانستان کې پاتې شوي دي.
