د کورنیو چارو وزارت د نشه يي توکو پر وړاندې مبارزې معینیت وايي، د الکولي مشروباتو، تریاکو، بنګ دانو، چرسو، نشه يي ټابلېټونو، زیکپ، هیروینو، تېزابو او نورو نشه يي توکو په ګډون یې زرګونه کیلوګرامه نشه يي توکي او په تړاو یې سلګونه کسان نیولي دي.
د دې وزارت د چارواکو په خبره، د یوه کال په اوږدو کې تر۲۰۰ زره کیلو ګرامو نشه يي توکي او په تړاو یې هم ۷۵۰ تنه نیول شوي چې په کې د نشه يي توکو لوی لوی قاچاقبران هم شامل دي.
د کورنیو چارو وزارت د نشه يي توکو پر وړاندې مبارزې معین وايي، د نیول شویو کسانو د محاکمې لړۍ روانه ده او ځینې یې محاکمه شوي هم دي.
د کورنیو چارو وزارت د نشهيي توکو پر وړاندې مبارزې معین قاسم خالد وايي: « په جریان د یوه کال یا له یوه کاله هم کمه موده کې تخمینا ً ۲۰۰ زره کیلوګرامه مختلف النوع نشه يي توکي چې تاسو یې دلته وینی، د مسوولینو له خوا راټول شوي دي. د دغو توکو قاچاقبران، مظنونین او ساقیان هم د مجاهدینو له خوا نیول شوي او محکمو ته سپارل شوي؛ د دوی له ډلې ځینې محکوم شوي او د ځینو دوسیې تر کار لاندې دي. شاوخوا ۷۵۰ تنه په دې تړاو نیول شوي دي.»
چارواکي وايي، دا نیول شوي نشه يي توکي له ګاونډیو هېوادونو په ځانګړې توګه له پاکستان او حتا له اروپايي هېوادونو افغانستان ته راوړل کېږي.
د کورنیو چارو وزارت ویاند عبدالمتین قانع وايي: « زموږ سرتېري او سرحدي ځواکونه په ټولو سرحدي سیمو کې متوجه دي، خو بیا هم موږ ګڼې پېښې لرو چې د سیمې له هېوادونو او په ځانګړې توګه پاکستان او دغه راز اروپايي هېوادونو د نشه يي توکو عصري ډولونه افغانستان ته راوړل کېږي. موږ هڅه کوو له هغوی سره په تفاهم د دغو موادو د قاچاق مخه ونیسو. همدارنګه هڅه کوو خپل سرحدي ځواکونه لا تجهیز کړو، ترڅو قاچاق په بشپړه توګه ختم شي.»
په همدې حال کې د نشه يي توکو پر وړاندې مبارزې معینیت د ځانګړې قطعې منسوبین ډاډ ورکوي چې په دې برخه کې به جدي مبارزه وکړي او د نشه يي توکو د قاچاق، تولید او کرکیلې مخه به ونیسي.
د دغو ځواکونو یو تن سرتېری قاري احمدي وايي: « موږ هېچا ته اجازه نه ورکوو چې د نشه يي توکو کاروبار وکړي. زموږ مجاهدین بوخت دي چې قاچاقبران او عملیان ونیسي او د قانون منګولو ته یې وسپاري.»
یو بل سرتېری ذبیحالله خپلواک وايي: « د قاچاقبرو مخه مو تر ډېره حده نیولې او په راتلونکي کې هم اجازه نه ورکوو چې د نشه يي توکو کاروبار وکړي.»
کورنیو چارو وزارت دغه راز وايي، له نشه يي توکو سره د مبارزې په برخه کې نړیوالې ټولنې ورسره د مرستو ژمنې کړې وې، خو تر اوسه کوم عملي ګام نه دی پورته شوی او په دې برخه کې شته لاسته راوړنې د امارت په خپلو امکاناتو لاسته راغلې دي.
د کورنیو چارو وزارت ویاند عبدالمتین قانع په دې اړه وايي: « په ډېر ناستو کې نړیوالې ټولنې او نړیوالو بنسټونو په دې برخه کې د همکاریو ژمنې کړې دي، خو له بده مرغه تر اوسه په دې اړه هېڅ ښکاره او اغېزناکه همکاري نه لرو؛ دا هرڅه یوازې د اسلامي امارت لاسته راوړنه ده.»
له نشه يي توکو سره د مبارزې معینیت زیاتوي، دا نیول شوي نشه يي توکي د پلازمېنې کابل په دروازو او د مرکزي زون په ولایتونو کې نیول شوي. د دوی په خبره، قاچاقبرانو غوښتل دا توکي له یو ولایت څخه بل ولایت ته او بیا يې بهر ته قاچاق کړي.
