کورنيو چارو وزارت افغانستان کې د نشهيي توکو د کر او قاچاق مخنيوي هڅو په لړ کې خبر ورکوي چې يو شمېر پاکستاني قاچاقبر يې افغانستان ته د يادو توکو د قاچاق په تړاو نيولي دي.
دغه څرګندونې د ياد وزارت د نشهيي توکو پر وړاندې مبارزې معين له شمشاد سره په ځانګړې مرکه کې کړې. دا په داسې حال کې ده چې څو مياشتې وړاندې د پاکستان تر کنټرول لاندې قبايلي سيمو او خيبرپښتونخوا کې د نشهيي توکو د کرکيلې زياتېدو په اړه راپورونه هم خپاره شول.
عبدالرحمان منیر وايي، په يادو سيمو کې په پراخه کچه نشهيي توکي کرل کېږي او د حاصلاتو له ټولولو وروسته يې افغانستان ته د قاچاق هڅې هم څو برابره زياتېږي.
د کورنیو چارو وزارت د نشهيي توکو پر وړاندې مبارزې معین عبدالرحمان منیر وايي: « له پاکستان سره بیا په ستونزو کې یو؛ د دوی له خوا نشه يي توکي زموږ خواته را واردېږي، موږ په دې تړاو د دوی قاچاقبر هم نیولي او مالونه مو ترې ضبط کړي. اوس هم له موږ سره پاکستاني قاچاقبر بندیان دي او په ټنونو مالونه یې پراته دي. زموږ او پاکستان ترمنځ ډېره اوږده فرضي کرښه پرته ده او د دې کرښې ساتنه او مخنیوی ډېر ستونزمن دی، که څه هم موږ خپله هڅه کړې ده.»
منير له دې امله د نشهيي توکو پر وړاندې د حکومت مبارزه مهمه بولي او وايي، د يادو توکو کرنه او سوداګري د شريعت خلاف دي.
نوموړی د يادو توکو پر وړاندې د حکومت پرېکنده دريځ ته په پام وايي، هېواد کې ۹۸ سنله د نشهيي توکو د کرکيلې او کاروبار مخه نيول شوې او هڅه کېږي دا کچه صفر ته راټيټه شي.
د کورنیو چارو وزارت د نشهيي توکو پر وړاندې مبارزې معین په دې اړه وايي: « اسلامي امارت له نشه يي توکو سره مبارزه یوه شرعي وجیبه او اسلامي وظیفه بولي. که چېرې هر نړیوال بنسټ یا هېوادونه له انصاف څخه کار واخلي، نو دا به ووايي چې موږ د نشه توکو د کرکیلې په مخنیوي او امنیت ټينګولو کې ۹۸ سلنه بریالي یو.»
ملګرو ملتونو هم په پرله پسې توګه په خپلو راپورونو کې د حکومت له لوري له نشهيي توکو سره د مبارزې پايلې مثبتې ارزولې دي. دا هغه څه دي چې د چارو شنونکي يې هم تایيدوي.
د چارو شنونکی ادریس محمدي ځاځی وايي: « د افغانستان اسلامي امارت له لاسته راوړنو څخه یوه دا هم ده چې د ټول افغانستان په کچه یې د نشه يي توکو کښت، قاچاق او استعمال مخنیوی کړی. دا په دې مانا نه چې په اسلام کې منع دي بلکې د دې لپاره هم دي چې دغه مواد د انسانیت لپاره خطر دی او په نړیواله کچه یې د مخنیوي لپاره کمپاینونه او مبارزه روانه ده.»
د چارو شنونکی نجیب الرحمان شمال وايي: « د نړیوالو قوانینو او دغه راز د اسلامي شریعت له مخې، د نشه يي توکو کرکیله او قاچاق منع دي او د اسلامي اصولو له مخې جایز نه دي. د افغانستان اوسني حکومت په تېرو څلورنیمو کالو کې په دې اړه جدي مبارزه کړې. د ملګرو ملتونو د ۲۰۲۵ کال په راپور کې دغې موضوع ته اشاره شوې او د حکومت له هلو ځلو یې ستاینه کړې.»
د نشهيي توکو پر وړاندې مبارزې معین بیا وايي، له دې پدیدې سره د مبارزې په برخه کې نړیوالو یوازې ورسره د کاغذ پرمخ ژمنې کړې او هېڅ ډول عملي بڼه یې نه ده خپله کړې.
دی زیاتوي، بدخشان، هلمند او ننګرهار ته د نشهيي توکو د کرکیلې مخنیوي په موخه سفرونه شوي او بزګرانو هم ورسره ژمنې کړې چې ياد توکي به نه کري.
