د کندهار په ارغنداب ولسوالۍ کې د سولې بنسټ په نوم یوې مرستندویه موسسې له خوا ۱۰۰ تنو باغ لرونکو ته د حاصلاتو راټولولو لپاره ځانګړي توکي ووېشل.
د یاد موسسې مسوولین وايي، ټاکل شوې د کندهار په اتو ولسوالیو کې ۲ زره باغ لرونکو ته د ۲۰۰ زره امریکايي ډالرو په ارزښت له مېوه لرونکو بوټو او ونو د حاصلاتو راټولولو دغه ځانګړي توکي ووېشل شي.
د دوی په خبره، له دې سره به کروندګر وکولی شي خپل حاصلات په خوندي او اسانه بڼه راټول کړي.
د سولې بنسټ موسسې مشر صبغتالله زبېر وايي:« زموږ بزګران تر اوسه په خپلو سیمه ییزو او دودیزو لارو د مېوو حاصلات ټولوي او مېوه ترې زیانمنېږي. د دې پروګرام موخه دا ده چې موږ له دوی سره عملي کار وکړو او د دغو عصري وسایلو په وېشلو سره د مېوه جاتو د ضایع کېدو مخه ونیسو.»
په کندهار کې د ټول هېواد پر کچه د ډول ډول مېوو لوی باغونه شته دي؛ باغ لرونکي د دغو توکو په ورکړه خوښ دي.
د دوی په خبره، د مېوو د حاصلاتو او په ځانګړي ډول انارو ټولولو په وخت کې به له ستونزو سره مخ وو او مېوې به یې زیانمې کېدې، خو له دې وروسته به خپلې مېوې په اسانه او خوندي ډول له بوټو او ونو راټولوي.
بڼوال شفیق الله وايي: « دا وسایل به له موږ سره ډېره مرسته وکړي، ځکه چې موږ به کله انار له ونو را ټولول، ډېر به رانه مات شول. اوس به د دغو وسایلو په کارولو سره د انارو د ژوبلېدو مخه ونیول شي.»
بڼوال احمد ولي با وايي:« دغه وسایل موږ ته ډېر ګټور دي او د مېوې له خرابېدو مخنیوی کوي.»
بڼوال رحمت الله په دې اړه وايي: « زموږ د انارو ونې ډېرې جګې دي او لاس نه ورسېږي. په دې سره به له ونو د انارو راټولول اسانه شي.»
دغه توکي داسې مهال وېشل کېږي، چې په کندهار کې لاهم باغ لرونکي او کروندګر له دودیزو لارو چارو ګټه اخلي چې امله یې ډېر کله حاصلات د راټولولو پرمهال د زیانمن کېدو له ګواښ سره مخ وي.
دوی وايي، که د دې ډول عصري وسایلو مرستې ورسره وشي، د حاصلاتو د زیان کچه به یې هم ټیټه شي.
