Skip to content
د کندهار ښار اوومې حوزې اړوند سیمه کې د عبدالنافع افتاب په نوم يو ځوان د خپل کلي څه باندې ۸۰ هلکانو او نجونو ته د شپې له خوا د عصري زده کړو زمینه برابره کړې ده.
افتاب وايي، موخه یې له خپل کلي د بېسوادۍ له منځه وړل او له عصري زد کړو د بې برخو ماشومانو روزل دي.
دغه راز افتاب وايي، د خپل کلي ماشومانو د روزلو لړۍ يې ځکه پېل کړه،چې په سيمه کې يې ښوونځی نشته او ماشومان یې له زده کړو بې برخې ول.
هغه د ورځي کار او د شپې له لوري په خپل اضافي وخت کې د خپل کلي ماشومانو په روزنه تېروي.
افتاب زیاتوي:«دلته مې د ماښام له لمانځه وروسته داسې یو صنف فعاله کړی،ترڅو په کلي کې بیسواي له منځه یوسو. دغه شاګردان که نجوني دي او که هلکان، دا په کوڅو کې ګرځي.»
د زده کړو په دغه کليوالي مرکز کې د هېواد د تعلمي نصاب اړوند د ښوونځی د لومړنۍ دورې درسي مواد تدرس کيږي.
هغه ماشومان چې د شپې له لخوا دلته تر شنه اسمان لاندې د سختي ګرمۍ، دوړو او باد په شتون کې زده کړې کوي،په خپله سيمه کې د ښوونځي د جوړېدو او نورو زده کړو غوښتنه کوي.
د یاد ښوونیز مرکز یوه زده کوونکې مزلفه وايي:« موږ غواړو،چې دلته مکتب جوړ شي. موږ غواړو،چې پر مخ ولاړ شو، درس ووای، که دوړې وي که باد و. موږ غواړ، چې مکتب جوړ شي، چې یو څه پر مخ ولاړ شو.»
د یاد ښوونیز مرکز یو بل زده کوونکی محمد یوسف بیا وايي:«ځکه موږ دلته یو مکتب غواړو. موږ په یوه مسجد کې سره راټول شوي یو،خپل درسونه وایو. دلته دوړې دي، ګرمي ده.»
د سيمي اوسېدونکي بيا د بېسوادۍ په لمنځه وړلو کې دا ډول هڅي ګټورې بولي،خو له مسوولينو غواړي،چې د دا ډول هڅو ملاتړ وکړي.
د کندهار ۱۵ حوزې یو تن اوسېدونکی عبدالقاهر وايي:« موږ له دولته غوښتنه کوو، یا له هغو خلکو څخه توانمندي لري، چې له موږ سره مرسته وکړي.»
که څه هم د کندهار په ښار او ولسوالیو کې تر درې سوه پوري ښوونځي شتون لري خو لاهم ځيني داسي سيمي شته دي،چې په کې هیڅ ښوونځی نشته دی او ماشومان یې له زده کړو بې برخي پاته دي.
