د کندهار په دامان ولسوالۍ کې کروندګر لګیا دي او خپلې ځمکې د زعفرانو کرلو لپاره چمتو کوي.
زعفران یو داسې بوټی دی چې لږې اوبه مصرفوي او لوړ عاید لري او خلک د کوکنارو د ښه بدیل او د کروندګرو د کورنیو لپاره د یوه دوامداره عاید په سترګه ورته ګوري.
کروندګر وایي، پرله پسې وچکالیو او د اوبو نه شتوالي د دوی حاصلات سخت اغېزمن کړي او کرنه یې ورته ډېره سخته کړې ده.
دوی د زعفرانو د پیازو یا تخم د وېش هرکلی کوي او له حکومته غواړي چې داسي کرنیزو توکو مرسته ورسره وکړي چې لږو اوبو ته اړتیا ولري.
د اکبرخان په نوم یو تن بزګر وايي: « زعفران ځکه یو ښه بدیل دی چې لږې اوبه غواړي او بزګرانو ته اقتصادي تمامېږي. بله ګټه یې دا ده چې په یوه جرېب ځمکې سره تر ۱۵۰ زره افغانیو عاید کوي.»
بزګر سردار ولي وايي: « موږ شاوخوا ۱۰ جریبه ځمکه د زعفرانو کښت لپاره چمتو کړې؛ له حکومت غوښتنه کوو دا داسې کرنیزو توکو په اړه مرسته وکړي چې لږو اوبو ته اړتیا لري.»
په همدې حال کې د کندهار کرنې ریاست مسوولین د کروندګرو ستونزې مني او وايي، د کوکنارو د کرکیلي د مخنیوي او د بدیل معیشت د برابرولو په موخه، سږ کال ۷۰ تنو کروندګرو ته د زعفرانو د تخم وېشلو پروګرام پیل شوی چې ۷ میلیونه او ۶۰ زره افغانۍ لګښت پرې راځي.
هغوی زیاتوي، دا پروګرام کولی شي د کرنې د ودې او د بزګرانو د عوایدو لوړېدو سبب شي.
د کندهار کرنې ریاست ویاند محمد حنیف حقمل وايي: « نن په کندهار کې د زعفران کرنه پيل شوه او د کرنې ریاست په ملاتړ ۷۰ تنو بزګرانو ته د ۷ میلیونه او ۶۰ زره افغانیو په لګښت د زعفرانو تخمونه ووېشل شول. دا تخمونه د دامان، خاکرېز، میانشین، معروف او نېش ولسوالیو بزګرانو ته وېشل کېږي. له دې کار څخه موخه بدیل معیشت او د نشه يي توکو پر وړاندې مبارزه ده او دا چې د کوکنارو په ځای د زعفرانو کښت عام کړو.»
دا په داسې حال کې ده چې زعفران په وروستیو کالو کې د کورنیو او نړیوالو بازارونو لپاره یو ارزښتناک کرنیز محصول ګڼل شوی او د وچو سیمو د کروندګرو پام یې ځان ته اړولی دی.
