ګڼ شمېر سیاسيونو، قومي مشرانو، دیني عالمانو او ځوانانو په ټاکنو کمیسیون غږ وکړ چې پاېلې دې نورې نه ځنډوي.
کندهار کې سياسي څېرو، قومي مشرانو او ديني عالمانو د يوې غونډې په ترڅ کې د ټاکنو د پاېلو د ژر اعلان غوښتنه وکړه.
د غونډې برخه والو هغه سیاسیون د ګاونډیو هېوادونو له څارګرو ادارو سره په همکارۍ تورن کړل، چې د لنډ مهالې ادارې د رامنځته کېدو غوښنه کوي.
غونډه کې د ټاکنیز کړکېچ یوازنی حل د ټاکنو د پایلو اعلان او د هغوی منل وګڼل شول.
دا غونډه د یو شمېر هغو سیاسیونو د څرګندونو په غبرګون جوړه شوې، چې تازه یې د لنډ مهالې حکومت د جوړېدو غوښتنه کړې ده.
دیني علماوو، قومي مشرانو، مدني فعالانو او عامو خلکو هغه شمېر سیاسیون او کړۍ بهرنیو څارګرو کړیو ته په کار کولو تورن کړل چې پر وینا یې لنډ مهاله حکومت غواړي.
د غونډې ګډونوالو د ټاکنو پر خپلواک کمېسیون غږ وکړ، چې ژر تر ژره د ولسمشرۍ ټاکنو پایلې اعلان کړي.
د دوی غوښتنه دا وه چې د ولسمشرۍ نوماندان دې قانون ته درناوی وکړي .
دوه ورځې وړاندې د حزب اسلامي مشر ګلبدین حکمتیار په یوه خبري غونډه کې د لنډ مهالي حکومت غوښتنه کړې وه او اوسنی حکومت یې د ټاکنو کمېسیون په چارو کې په لاسوهنو تورن کړی و.
