کندهار کې د وروستیو ورښتونو او سېلابونو پرمهال ۹ کسانو خپل ژوند بایللی او ۱۸ نور ټپیان شوي دي، حال دا چې دغو سېلابونو له ۷۰۰ څخه زیات کورونه ویجاړ کړي هم دي.
د کندهار د طبیعي پېښو پر وړاندې مبارزې ریاست، د کډوالۍ نړیوال سازمان(آیاواېم) او د خوړو نړیوال پروګرام(ډبلیواېفپي) په مالي ملاتړ د دوشنبې په ورځ۲۷۰ کورنیو ته بېړنۍ خوراکي او غیرخوراکي مرستې ووېشلې.
د دې ریاست د مسوولینو په خبره، دا مرستې د سېلاب ځپلو کورنیو د بېړنۍ ملاتړ لپاره ترسره شوې دي او هڅې روانې دي چې نورو زیانمنو کورنیو ته هم رسېدنه وشي.
د پېښو پر وړاندې چمتوالي او مبارزې رییس عبدالسلام عمري وايي: « په مجموع کې ۷۱۰ کورونه په بشپړه او نسبي ډول ویجاړ شوي دي. موږ تېره اوونۍ ۱۸۲ کورنیو ته د مرستندویه موسسو په همغږۍ خوراکي او غیر خوراکي توکي ووېشل. نن هم ۲۷۰ نورو کورنیو ته د خوراکي، غیرخوراکي او نغدي مرستو وېش لرو. همدارنګه د نورو کورنیو سروې هم روانه ده.»
د دامان ولسوالۍ استازی محب الله ولسمل وايي: « سېلابونو په کندهار او ځانګړې توګه دامان ولسوالۍ کې لوی زیانونه ورسول. د دې خیریه بنسټونو کور ودان چې له سېلاب ځپلو سره مرسته کوي.»
بله خوا، یو شمېر سېلاب ځپلې کورنۍ د دغو مرستو هرکلی کوي او وایي، د سېلابونو له امله یې ټول کورونه او شتمنۍ له منځه تللي او له همدې امله حکومت څخه غوښتنه کوي چې ژر تر ژره دې د کورونو بیارغونې په برخه کې ورسره مرسته وکړي.
سېلاب ځپلی دلبرخان وايي: « زموږ پر کور سېلاب راغی، ما یوازې خپل ماشومان له کوره و ایستل او پاتې هرڅه یې یوړل. همدارنګه زموږ فصلونه، باغونه او څاروي یې هم له منځه یوړل.»
سېلاب ځپلی حافظ نسیم وايي: « که څه هم دا مرستې زموږ زیان نه شي جبرانولی، خو بیا هم ښې دي. باید له موږ سره د کورونو په جوړولو او دغه راز د سېل اوبو مخې ته د استنادي دېوالونو په جوړولو کې مرسته وکړي.»
سېلاب ځپلی عبدالسلام وايي: « زموږ سرایونه تخریب شوي او دا مرستې یې ځای نه شي نیولی. حکومت او موسسې باید د هغو په جوړولو کې زموږ مرسته وکړي.»
د معلوماتو له مخې، وروستیو سېلابونو د استوګنې کورونو نړولو ترڅنګ، زرګونه جرېبه کرنیزه ځمکه هم په بشپړه توګه له منځه وړې ده.
