کندهار کې د کتاب چاپ کولو چارې کمرنګه شوي

په کندهار ولایت کې یو شمېر ليکوالان او د چاپ خونو مسوولين وایي، له تېرو دوو کلونو راهیسې د کتاب چاپ کولو چارې ټکنۍ شوي. 

دوی د کتابونو  د چاپ  کولو چارو ټکني کېډو لامل د ليکوالانو ټيټ اقتصاد په ګوته کوي.

کندهار ښار کې د یوې چاپ خونې مسوول محمد علي وايي:« دا څویم کال دی، چې لیکوالان کتابونو چاپ ته زړه نه ښه کوي، اقتصادي وضعیت یې سم نه دی، نو له همدې امله زموږ چارې هم ورسره ټکنۍ شوي دي.» 

د محمد سحر په نوم د کندهار يو تن ليکوال،چې وړاندي يې يو کتاب چاپ شوی او دوه نور يې د چاپ لپاره چمتو دي وایي،د ليکوالانو اقتصادي ستونزو له امله د کتابونو د چاپ چارې له تېرو دوه کلونو راهیسې درېدلي دي.

سحر وايي، له  مسوولينو  غواړي،چې په دې برخه کې  ورسره مرسته وکړي. 

سحر زیاته کړه:« له تېرو دوو کلونو راهیسې د کتاب چاپ کولو برخه کې له ستونزو سره مخ یو. زموږ اقتصادي  حالت دومره ښه نه دی، چې پر خپل لګښت کتاب چاپ کړو.» 

پر همدې مهال د کندهار د اطلاعاتو او فرهنګ مشر نوراحمد سعيد په دې برخه کې د تازه هڅو د پیل یادونه کوي او وايي، ډېر ژر به د کتاب چاپ کولو درېدلې لړۍ راپیل کړي.

سعيد  زیاتوي:« همدا اوس په کندهار کې د طلوع افغان ورځپاڼه په ډېره ښه او معیاري بڼه چاپ کېږي. د کتابونو د چاپ کولو په برخه کې مو هم جدي هڅې روانې دي او ډېر ژر به دغه برخه کې هم  د پام وړ لاسته راوړنې ولرو.» 

که څه هم کندهار کې د ليکوالۍ چارې له تېرو دوو کلونو راهیسې د پخوا پرتله کم رنګه شوي،خو د اسلامي امارت په راتګ سره اوونيزي مشاعري او ادبي ناستي پاستې یو ځل بیا په ښه  ډول پیل شوي او د ادب مینوال پرې خپله مینه ماتوي.