په کندهار ولایت کې د څارویو پوستکو راټولولو یوازې یوه کارخونه شتون لري، چې د سویلي زون د ولایتونو ټول پوستکي ورته راوړل کیږي او هلته تر وچېدو وروسته پاکستان ته صادریږي.
د کارخونې مسوولین وايي، له تېرو ۳۰ کلونو راهیسې دغه کاروبار کوي او هره میاشت ۱۰۰ زره د څارویو پوستونه او زیاته اندازه کولمې راټولوي، خو د پروسیس ماشینرۍ نشتون له امله یوازې یې وچوي او پاکستان یې صادروي.
دوی زیاتوي، د سرپرست حکومت له خوا د خاریجي مالګي بندیدل، د ځانګړي ځای نشتون او له پاکستان پرته نورو هېوادونو ته د صادراتو نشتون هغه څه دي چې د دوی کاروبارو يي زیانمن کړی.
د پوستکو کارخونې مسوول علي اجمد وايي:«له کندهاره یوازې ۱۰۰ زره پوستکي راځي. زموږ ستونزې ډېري دي. لومړی د مالګې ده، د کان مالګه کار نه کوي، موږ ته سمندري مالګه کار کوي چې هغه حکومت بنده کړې او نه یې پرېږدي. زموږ ټول کار د مالګې له امله درول شوی. دویمه موږ ځای نه لرو. موږ ته یې په صنعتي پارک کې هېڅ ځای نه دی راکړی. زموږ ځای تاسې ګورئ. درېیمه ستونزه مو دا ده چې موږ هېڅ نړیوال بازار نه لرو، که موږ نړیوال بازار ولرو، له موږ سره په زرګونه کسان کار وکړي چې په هره کارخونه کې به له موږ سره شاوخوا ۷۰۰ تر ۸۰۰ ګاریګرو پورې په ښو معاشونو باندې کار وکړي. دا دی چې موږ نړیوال بازار نه لرو، زموږ ټول مال پاکستان ته لېږو. »
اوس مهال په کندهار کې د څارویو د پوستکو او کولمو بیې ډېرې ټیټي دي.
د پوستکو او کولمو پر کار بوخت کسان وايي دوی یوازې دلته پوستکي او کولمې پاکوي او تر وچولو وروسته پاکستان ته صادریږي، خو که له پوستکي د توکو جوړولو کارخونې پر کوردننه جوړې شي نو ډېرو نورو خلکو ته به د کار زمینه برابره سي.
د پوستکو کارخونې کارکوونکی صالح محمد وايي:« پخوا به له افغانستاه مالونه جرمني ته تلل، خو اوس دلته کارونه خرابه دي. اوس مالونه پاکستان ته ځي، له دې پاکستان ګټه کوي. که چېرې هېواد کې دا کار سم شي، نو خلک به هم پر کار شي.»
د پوستکو کارخونې یوبل کارکوونکی محمد عوض وايي:«موږ دا پوستکي د کندهار ولایت کې راټولوو، په دې کې د غواګانو، پسونو او اوزو پوستکي دي. دلته یې پاکوو او مالګه ورکوو، بیا یې کویټې ته استوو. له هلمند او هرات هم پوستکي راځي. له نمیروز هم راځي. »
په ورته وخت کې د دغه ولایت کرنې او مالدارۍ ریاست د مالدارۍ آمر حافظ حمیدالله وايي، د څارویو پوستکو کاروباریانو ستونزې د ټول هېواد پر کچه دي او دوی له وزارت سره شریکې کړې دي.
هغه زیاتوي:« زه به د پوستکو په اړه درته ووایم چې دا د ټول هېواد مساله ده، یوازې کندهار پورې اړه نه لري، دا مساله د هرات هم ده، د ننګرهار، مرازشریف مساله هم ده، د شمال او سویل مساله ده، د افغانستان مساله ده، نو پر دې باندې به وزارت یوه طرحه جوړه کړې وي. انشاء الله کار پرې روان دی. له هغې خوا چې ستونزې حل شي، یا تجارت خلاص شي، یا له چا سره قراردادونه وشي. انشاء الله دا مساله حل کېږي. »
په بهرنیو هېوادونو کې د څارویو له پوستکو تر پروسیس وروسته د بیکونو، بوټانو، خولیو او یو شمیر نورو توکو جوړولو کې ګټه اخیستل کیږي، چې ورڅخه جوړ شوي توکي له ښه کیفیت برخمن دي.
