Skip to content
په کندهار ولایت کې د میروس حوزوي روغتیون مسوولین وايي، د ناروغانو شمېر یې هره ورځ په اوسط ډول له ۱۲۰۰ اوړي، خو په خبره یې دا مهال په کې یوازې د ۳۵۰ بستره وړتیا لري.
که څه هم د جګړې په پای ته رسېدو سره دغه روغتون کې د جګړې د ټپيانو شمېر صفر ته راټيټ شوی، خو د روغتون د مسوولینو په خبره، د لارو په خلاصېدو سره یې، د پخوا پرتله د ناروغانو شمېر څو برابره لوړ شوی دی.
د میرویس حوزوي روغتون د جراحي څانګې مسوول ډاکټر عزیز احمد عزیز وايي:« که څه هم مخکې د جګړې د ټپيانو شمېر زیات وو،خو اوس د مراجعینو شمېر څو برابره لوړ شوی دی،ځکه له ولسوالیو سره ټولې لارې خلاصې شوې او ټول ناروغان همدلته مراجعه کوي.»
مسوولین که څه هم دغه روغتون د هېواد له لویو روغتونو څخه ګڼي،خو وايي، د ځای، تشکیل، متخصص ډاکټرانو او عصري امکاناتو کمښت یې له لویو ستونزو دي.
د میرویس حوزوي روغتون سرطبیب ډاکټر محمد قاسم وايي:« میروس روغتون د هېواد له لویو روغتونونو شمېرل کېږي، خو لا هم ځینې اړتیاوې لرو، چې باید پوره شي. عصري امکانات او ماشینري، متخصص ډاکټران او د ځای کمښت مو اړتیاوې دي.»
د کندهار تر څنګ، اروزګان، هلمند، زابل، غزني، فراه، غور، دایکنډي او نیمروز هغه ولایتونه دي، چې ناروغان یې د کندهار میروس روغتون ته راوړل کېږي.
د دغه روغتون د نسايي او ولادي برخې مشره ډاکټره فرشته یوسفزۍ وایي، له ولایتونو د راوړل شویو ښځينه ناروغانو د پایوازانو د ځای کمښت یې هم له لویو ستونزو ده.
یوسفزۍ زیاته کړه:« باید دلته د نسايي لادي ناروغانو لپاره یو جلا لوی روغتون موجود وی. زموږ د مراجعینو توقع ډېره لویه وي، خو موږ د ځای د کمښت له امله د هغوی ټولې اړتیاوې نه شو پوره کولای.»
دغه روغتون چې ۴۷ کاله وړاندې ۱۳۵۳ هجري لمریز کال د افغانستان په سوېلي ولایت کندهار ښار کې د چین هېواد په مالي لګښت او ډیزاین جوړ شوی، دا مهال يې مالي او روغتیايي امکانات د (آی سي آر سي) یا سره صلیب نړیوالې کمېټې له لورې برابرېږي.
