د رياست الوزرا اقتصادي مرستيال ملا عبدالغني برادر اخوند د کندهار په ارغستان ولسوالۍ کې د لورې بند د ډېزاين او امکان سنجۍ پروژه پرانيستله.
ملا برادر دغه پروژه د اوبو مديريت ته د سرپرست حکومت ژمنتيا نښه بولي او ډاډ ورکوي چې د بندونو جوړولو لړۍ ته به ادامه ورکوي.
له دې سره، د اوبو او انرژۍ وزارت سرپرست ملا عبداللطيف منصور وايي، د اوبو مديريت په برخه کې د لورې بند رول مهم دی او د ډيزاين او براوورد له بشپړېدو سره به يې عملي کارونه هم پيل شي.
د اوبو او انرژۍ وزارت ویاند مطیع الله عابد وايي: « د کندهار ولایت د ارغستان ولسوالۍ د لورې بند د ډیزاین او سروې چارې د ۱۰۲ میلیونو افغانیو په پانګونې سره د ریاست الوزرا اقتصادي مرستیال ملا عبدالغني براردار اخوند، د اوبو او انرژۍ وزارت د سرپرست ملاعبدالطیف منصور، د اطلاعاتو او فرهنګ وزارت د سرپرست ملا خیرالله خیرخوا، ملي پانګوال حاجي بشر او د سیمې د ګڼ شمېر اوسېدونکو په حضور کې پرانیستل شو. د یادونې وړ ده چې قدرمنو مشرانو دغه پروژه د هېواد اقتصادي ودې، د اوبو مدیریت او د خلکو د سوکالۍ په برخه کې ارزښتمن ګام وګاڼه.»
د دغه وزارت په خبره، د پروژې د امکان سنجۍ او تفصیلي ډیزاین د مطالعې چارې د ۱۰۲ میلیونه افغانیو په ارزښت یوه خصوصي شرکت ته سپارل شوي چې د ۱۸ میاشتو په موده کې به بشپړې شي.
