Skip to content
د کندهار په دویمه عېنو مېنه کې پر ۳۰ هکټاره ځمکه د زیتونو جوړ شوي فارم حاصل د تېر کال پرتله ډېر شوی دی.
د افکو کمپنۍ د کرني د برخي مشر انجينر عبدالرازق وایي له یاد فارم نه سږ کال ۳۰ ټنه حاصل ترلاسه شوی، چې دا د تېر کال پرتله ۵۰ سلنه زیات دی.
عبدالرازق وایې، دا مهال کندهار کې توليد شوي زیتون د پروسيس په موخه جلال آباد ته استول کیږي،خو په خبره یې دوی هڅه کوي،راتلونکې کې د زیتونو د پروسېس کارخونه کندهار کې پرانيزي.
عبدالرازق زیاتوي:« موږ د اوس لپاره دلته د زیتون د پروسس لپاره فابریکه نه لرو، د پېکینګ چارو لپاره یې جلال اباد ته لېږو. په راتلونکي کې موږ پلان لرو،چې د پروسس لپاره یې همدلته کارخونه جوړه کړو. موږ غواړو، راتلونکو کلونو کې د زیتونو ونې زیاتې کړو،تر څو د عایداتو کچه هم ورسره لوړه شي.»
د زېتونو د۵۰ زره لرونکو ونو دغه فارم کلونه وړاندي جوړ شوی،خو د کندهار د کرني رياست مسوولين وایي، اوس د کوکنارو د مخنيوي له بدېلو کښتونو له ډلي شمېرل کیږي.
د یاد ریاست د ترويج مدير محمدالله نوري وایي، د کندهار توليد شوي زیتون د ننګرهار له زیتونو درې درجي لوړ دي.
نوري زیاتوي: « کندهار کې چې کوم زیتون تولید کېږي، د دې مېوه ننګرهار ته وړل کېږي.هلته یې د ځانګړو ماشینونو پر مټ غوړ اېستل کېږي. زموږ له څېړنو ثابته شوې، چې د کندهار زیتون د ننګرهار له زیتونو دوه درجې لوړ کیفیت لري. موږ همدا ډول د کندهار د لویې عیداګاه په جامع جومات کې څلور زره د زیتونو نیالګي ایښي دي.»
زیتون، چې پنځه ډوله لري،کمو اوبو او خوارۍ ته اړتیا لري،زيات حاصلات يې له ننګرهار ولایت څخه ترلاسه کېږي، خو وروستیو کلونو کې د کندهار په ګډون په شمېر نورو ولایتونو کې هم د زیتونو فارمونه جوړ شوي،چې د چارواکو په خبره له پروسيس وروسته کورنیو بازارونو ته وړاندي شوي دي.
