د کندهار انګور پاخه او د حاصلاتو را ټولولو وخت یې را رسېدلی.
بڼوال وايي، سږکال د انګورو حاصلات ښه شوي، خو د صادراتي لارو تړل کېدو له امله یې محصولاتو ته مناسب بازار نه دی موندل شوی.
د دوی په خبره، په کور دننه د حاصلاتو لپاره د بازار موندنې خراب وضعیت هغه لګښتونه نه شي پوره کولی چې بزګرانو او سوداګر یې د کرنیزو محصولاتو په ترلاسه کولو کوي.
بڼوال صدیق الله وايي: « د انګورو حاصلات یو په دوه زیات شوي او ښه فصل لري، خو لارې بندې دي. موږ تېر کال له دې بڼوال سره زر تنه په کار بوخت وو، خو اوس چې ډېر یو، نو پنځوس تنه به یو. موږ څو کسان انګور له تاکونو شکوو او څو نور یې په کشمیش خونو کې ځوړندوي.»
بڼوال عصمت الله وايي: « تېر کال موږ شاوخوا ۱۲ سوه تنه په کار بوخت وو، خو اوس یوازې سل کسه په کار بوخت دي. زموږ ستونزه د لارو بندېدل دي، موږ غوښتنه کوو چې لارې خلاصې شي. زموږ بڼوالو او سوداګرو ته زیانونه رسېدلي.»
په کندهار کې د انګورو سوداګر هم مني چې تېر کلونه دا وخت به يې هره ورځ لسګونه لارۍ انګور بهر ته صادرول، خو د لارو بندېدو له امله يې سږکال په کشمش خونو کې وچوي او په ممیز یا کشمشو يې بدلوي.
د بڼوالو ترڅنګ سوداګر هم شکایت لري چې بهر ته د کرنیزو محصولاتو د صادرولو لپاره یې زمینه نه ده برابره شوې او دوی اړ شوي چې راټول شوي انګور په کشمش خونو کې وچ کړي.
د انګورو سوداګر نور محمد وايي: « تېر کال به مو په همدې وخت کې تر ۸۰ ټېلره انګور استولي وو، خو اوس هېڅ هم نه شته، بس شکوو یې او دلته یې را ځوړندوو. لږترلږه دومره به شي چې کړي لګښتونه پوره کړي.»
د کرنې او مالدارۍ وزارت چارواکي بیا د بزګرانو او سوداګرو دې غوښتنو ته په پام، د تازه مېوو لپاره د سړو خونو پر جوړولو ټینګار لري او زیاتوي چې په نورو هېوادونو کې د پلور لپاره د بازار پر موندلو هم کار روان دی.
د کرنې، اوبو لګولو او مالدارۍ وزارت معین مولوي صدراعظم عثماني وايي: « زموږ کوشش دا دی چې په هر زون کې معیاري سړې خونې جوړې او زموږ محصولات په کې وساتل شي. د بازار موندنې لپاره هم هڅه شوې او د همدې لپاره د یوه نندارتون پر جوړولو کار روان دی، ترڅو خپلو محصولاتو ته بازار پيدا کړو.»
د کندهار کرنې ریاست د معلوماتو پر بنسټ ، سږکال د انګورو حاصلات ۱۰۰۰ ټنه زیات شوي دي. د دوی په خبره، دا مهال په کندهار کې پر ۲۰ زره او ۶۰۰ هکټاره ځمکو د انګورو باغونه شته او تمه ده چې ۲۰۶ زره ټنه انګور ترې راټول شي.
