په کندهار کې د سولې غوښتنې په نوم یوې غونډې کې لسګونه دیني علماء،قومي مشران او مدني فعالان راټول شوي او د سولې په بین الافغاني خبرو کې یې اوربند ته پر لومړیتوب ټېګار وکړ.
د دې غونډي ګډونوال وايي، له افغانستانه بهرني ځواکونه د وتلو په حال کې دي،د جګړې بهانه پاتې نه ده او نوره دا جګړه حرامه ده.
دوی وايي، دواړه لورې دې پر هغو میکانیزمونو کار وکړي، چې له مخې یې بېړني اوربند ته لاره هوارېږي.
دیني عالم وايي: « نن زموږ په هېواد کې مرګ ډېر اسانه شوی. د خدای په لحاظ پر کونډه، یتیم او دغه مظلوم ملت باندې نور لږ رحم وکړئ.»
د غونډې یو شمېر نورو ګډونوالو بیا پر ځینو ګاونډیو هېوادونو تور پوري کړ، چې د سولې برخه کې یې ريښتنی عمل نه دی کړی او د سولې پر وړاندې خنډونه رامنځته کوي.
دې غونډه کې یو بل تن دیني عالم بیا داسې وايي:« خدای مو یو دی. نبي مو یو دی. قرآن مو یو دی. نو جګړه د څه لپاره کوئ.»
د دې ولایت په ګډون د هېواد په ډېرو سيمو کې جګړې زیاتې شوي او د دواړو لورویو تر څنګ ملکي وګړو ته هم د درنې مرګ ژوبلې خبرونه ورکول کېږي.
