د کندهار ولایت دامان ولسوالي هغه ځای دی چې په کې د غنمو پراخ کښتونه شته او د غنمو حاصلات یې په ټول هېواد کې ځانګړی شهرت لري.
د دې ځای د غنمو کروندګر وايي، سږکال د زیاتو بارانونو او زراعتي امراضو د کمښت له امله په حاصلاتو کې د نورو کلونو په پرتله د پام وړ زیاتوالی راغلی.
کروندګر یار محمد وايي: « سږ کال د کندهار د غنمو حاصلات ډېر ښه او برابر وو؛ ځکه چې له یوې خوا بارانونه وو، کال آباد و او له بلې خوا نباتي ناروغۍ هم نه وې. له حکومت غوښتنه کوو چې د غنمو د حاصلاتو ساتلو لپاره مرسته وکړي.»
کروندګر حسن خان وايي: « د کندهار زردانه غنم تر ټولو ښه غنم دی او سږ کال یې ښه حاصل هم کړی. سږ کال زموږ فصلونه برابر دي او کروندګر هم خوښ دي.»
په ورته مهال، د کندهار کرنې ریاست مسوولین وایي، سږکال د دې ولایت په بېلابېلو ولسوالیو کې پر څه باندې ۹۸زره هکټاره ځمکو غنم کرل شوي چې په وینا یې، کروندکر به ترې ۳۶۹ زره ټنه حاصلات ترلاسه کړي.
د دوی په خبره، بریالی شوي چې په روان کال کې له کروندګرو سره د غنمو د اصلاح شوي تخم، کیمیاوي سرې او نورو زراعتي امکاناتو مرستې ترسره کړي چې په خبره یې راتلونکی کال به د غنمو حاصلات نور هم زیات شي.
د کندهار کرنې او مالدارۍ ریاست ویاند محمد حنیف حقمل وايي: « موږ سږ کال په کندهار کې په ۹۸ زره ۳۸۲ هکټاره ځمکو غنم لرو . له دغو ځمکو به د اټکل له مخې ۳۶۹ زره ټنه حاصلات ترلاسه شي.»
په کندهار کې د غنمو بېلابېل ډولونه یا (ورایټۍ) کرل کېږي چې مشهور یې داماني، کابلي، مقاوم او نور دي چې ښه حاصلات ورکوي او کیفیت يې هم ښه دی.
